സംവിധായകന്‍ ജോഷിക്ക് ഏറ്റവും പ്രിയപ്പെട്ട താരം ആരാണ്?. മുമ്പാണെങ്കില്‍ അത് ‘മമ്മൂട്ടി’ എന്ന് കണ്ണുമടച്ച് പറയാമായിരുന്നു. കാരണം മമ്മൂട്ടിക്ക് ഏറ്റവുമധികം വിജയങ്ങള്‍ നല്‍കിയ, ‘ന്യൂഡല്‍ഹി’ പോലെ ഒരു വമ്പന്‍ ഹിറ്റ് സമ്മാനിച്ച സംവിധായകനാണ് ജോഷി. അദ്ദേഹത്തിന്‍റെ ഏറ്റവും കൂടുതല്‍ ചിത്രങ്ങളില്‍ അഭിനയിച്ച നായകനടനും മമ്മൂട്ടി തന്നെ. എന്നാല്‍ ഇപ്പോള്‍ കഥ മാറിയിരിക്കുന്നു. ജോഷിക്ക് ഏറ്റവും പ്രിയപ്പെട്ട നടന്‍ ഇപ്പോള്‍ മോഹന്‍ലാലാണ്.
മോഹന്‍ലാലിനൊപ്പം തുടര്‍ച്ചയായി സിനിമകള്‍ പ്ലാന്‍ ചെയ്യുകയാണ് ജോഷി. നരന്‍, ട്വന്‍റി20, ക്രിസ്ത്യന്‍ ബ്രദേഴ്സ് എന്നീ വമ്പന്‍ ഹിറ്റുകള്‍ക്ക് ശേഷം റണ്‍ ബേബി റണ്‍ കൂടി തകര്‍പ്പന്‍ വിജയമായതോടെ തന്‍റെ ഭാഗ്യനായകനായി ജോഷി മോഹന്‍ലാലിനെ ഒപ്പം കൂട്ടുകയായിരുന്നു. എന്നാല്‍ കഴിഞ്ഞ ചിത്രമായ ലോക്പാലില്‍ ലാല്‍ - ജോഷി കൂട്ടുകെട്ട് പരാജയപ്പെട്ടു. എന്നാല്‍ മോഹന്‍ലാലിലുള്ള വിശ്വാസം ജോഷിക്ക് കൂടുകയാണ്.
ജോഷിയുടെ അടുത്ത ചിത്രത്തിലും നായകന്‍ മോഹന്ലാല് തന്നെ. ഉദയ്കൃഷ്ണ - സിബി കെ തോമസ് ടീം തിരക്കഥ രചിക്കുന്ന ചിത്രത്തില്‍ ജയറാം, ബിജുമേനോന്‍ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
അമലാ പോള് ആണ് ഈ സിനിമയില്‍ മോഹന്‍ലാലിന്‍റെ നായിക. റണ്‍ ബേബി റണ്ണിന്‍റെ മാജിക് ആവര്‍ത്തിക്കാനാണ് ലാല്‍ - അമല പോള് ജോഡി ഒരുങ്ങുന്നത്.
സുബൈര്‍ നിര്‍മ്മിക്കുന്ന ചിത്രം ഏപ്രിലില്‍ ചിത്രീകരണം ആരംഭിക്കുകയാണ്. സൂപ്പര്‍ ആക്ഷന്‍ എന്‍റര്‍ടെയ്നറായിരിക്കും ചിത്രമെന്നാണ് ആദ്യ റിപ്പോര്‍ട്ടുകള്‍.
