മമ്മൂട്ടിയെ വെച്ച് നിരവധി ഹിറ്റുകള്‍ സൃഷ്ടിച്ച സംവിധായകനാണ് ഐ വി ശശി. കുറച്ചുകാലമായി ഐ വി ശശി സജീവമായിരുന്നില്ല. എന്നാല്‍ ഒരു മടങ്ങി വരവിനൊരുങ്ങുന്ന ഐ വി ശശിയോടൊപ്പം മമ്മൂട്ടിയുടെ മകനായ ദുല്‍ഖറും ഒരു ചിത്രത്തില്‍ ഒന്നിക്കുവത്രേ.
നിത്യ മേനോന്‍ നായികയായ വെള്ളത്തൂവലാണ് മലയാളത്തില്‍ ഐ വി ശശി സംവിധാനം ചെയ്ത അവസാന ചിത്രം. അതിന് മുമ്പ് മമ്മൂട്ടിയെയും ബോളിവുഡ് താരം കത്രീന കൈഫിനേയും ഒന്നിച്ചഭിനയിപ്പിച്ച ബല്‍റാംvsതാരാദാസ് വമ്പന്‍ പരാജയമായിരുന്നു.
ഇപ്പോള്‍ മമ്മൂട്ടിയെ നായകനാക്കിയും അന്തരിച്ച ടി ദാമോദരന്‍ നേരത്തേ എഴുതിയ തിരക്കഥ സിനിമയാക്കാനുള്ള ഒരുക്കത്തിലാണ് സംവിധായകന്‍. തിരക്കഥയുടെ അവസാന മിനുക്കുപണികള്‍ ടി ദാമോദരന്റെ മകള്‍ ദീദി ദാമോദരന്‍ ചെയ്തു കൊണ്ടിരിക്കുകയാണ്.
ദുല്‍ഖറുമൊത്തുള്ള ചിത്രത്തെക്കുറിച്ച് ചര്‍ച്ചകള്‍ നടക്കുന്നുണ്ടെന്നും എന്നാല്‍ കൂടുതല്‍ കാര്യങ്ങള്‍ തല്‍ക്കാലം വെളിപ്പെടുത്താനാവില്ലെന്നും ഐ വി ശശി ഒരു ദേശീയമാധ്യമത്തിനു നല്‍കിയ അഭിമുഖത്തില്‍ പറയുന്നു.
