ആസിഡ് ആക്രമണത്തിന് ഇരയാകുന്ന പെണ്‍കുട്ടിയുടെ കഥ പറയുന്ന ചിത്രമാണ് ഉയരെ. ചിത്രത്തിൽ നായികയായെത്തുന്നത് പാർവതി തിരുവോത്ത് ആണ്. ഈ ചിത്രം തനിക്ക് നൽകുന്നത് ഉയിർത്തെഴുന്നേൽക്കാനുള്ള ഊർജ്ജമെന്ന് താരം വ്യക്തമാക്കുകയാണ്.

'ജീവിതത്തില്‍ ഏത് തരത്തിലുള്ള തിരിച്ചടികള്‍ നേരിടേണ്ടി വന്നാലും മാര്‍ഗ്ഗം ഒന്നു തന്നെ മുന്നോട്ട്'- എന്നും നടി കൂട്ടിച്ചേർത്തു. ചിത്രത്തിന്റെ മോഷന്‍ പോസ്റ്റര്‍ ഇന്ന് വൈകിട്ട് 7മണിക്ക് പുറത്തുവിടുമെന്നും നടി അറിയിച്ചു.

പല്ലവി എന്ന കഥാപാത്രമായാണ് പാര്‍വതി അഭിനയിക്കുന്നത്. ടോവിനോ തോമസ്, ആസിഫ് അലി എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.

രാജേഷ് പിള്ളയുടെ സഹായി ആയിരുന്ന മനു അശോകന്‍ സംവിധാനം ചെയ്യുന്ന ഈ സിനിമയ്ക്ക് തിരക്കഥയെഴുതുന്നത് സഞ്ജയ് - ബോബി ടീമാണ്. ഗോപി സുന്ദര്‍ സംഗീതം നിര്‍വഹിക്കുന്ന സിനിമയുടെ ക്യാമറ മുകേഷ് മുരളീധരന്‍. എഡിറ്റിംഗ് മഹേഷ് നാരായണന്‍.

സമൂഹത്തില്‍ ഏറെ ചര്‍ച്ച ചെയ്യപ്പെടുന്ന ആസിഡ് ആക്രമണ സംഭവങ്ങളുടെ പശ്ചാത്തലത്തില്‍ അതിതീവ്രമായ ഒരു കഥയാണ് ചിത്രം കൈകാര്യം ചെയ്യുന്നത്. രണ്‍ജി പണിക്കര്‍, പ്രതാപ് പോത്തന്‍, പ്രേം പ്രകാശ് തുടങ്ങിയവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.