ഫെബ്രുവരി പത്തിന് ആരാധകർ കാത്തിരിക്കുന്നത് രണ്ട് കാര്യങ്ങൾക്കാണ്. ഒന്ന്, പൃഥ്വിരാജിന്റെ ഹൊറർ ചിത്രം എസ്രയുടെ റിലീസ്. രണ്ട്, എസ്ര പ്രദർശിപ്പിക്കുന്ന ചില തീയേറ്ററുകളിൽ മമ്മൂട്ടിയുടെ ഗ്രേറ്റ് ഫാദറിന്റെ ടീസറും പുറത്തിറക്കുന്നുണ്ട്. ചുരുക്കിപറഞ്ഞാൽ മെഗാ ഓഫർ തന്നെയാണിത്.

നവാഗതനായ ജയ്കൃഷ്ണനാണ് എസ്രയുടെ സംവിധാനം. രഞ്ജന്‍ എന്നാണ് പൃഥ്വിരാജ് അവതരിപ്പിക്കുന്ന കഥാപാത്രത്തിന്റെ പേര്. ടൊവിനോ, പ്രിയ ആനന്ദ് തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിക്കുന്നു.

ഇ ഫോര്‍ എന്റര്‍ടെയിന്‍മെന്റിന്റെ ബാനറില്‍ മുകേഷ് ആര്‍ മേത്തയും സിവി സാരഥിയുമാണ് നിര്‍മ്മാണം. ജൂതഭാഷയില്‍ രക്ഷിക്കൂ എന്നര്‍ത്ഥം വരുന്ന വാക്കാണ് എസ്ര.

മമ്മൂട്ടി ആരാധകര്‍ ഈ വർഷം ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ദ് ഗ്രേറ്റ് ഫാദർ. നവാഗനായ ഹനീഫ് അദേനിയാണ് ഈ ആക്​ഷൻ ത്രില്ലര്‍ സംവിധാനം ചെയ്യുന്നത്. പൃഥ്വിരാജിന്റെ ഉടമസ്ഥതയിലുള്ള ആഗസ്റ്റ് സിനിമാസ് ആണ് നിർമാണം. കിടിലൻ ടീസറായിരിക്കും പുറത്തിറങ്ങുക എന്ന കാ‌ര്യത്തിൽ സംശമില്ല. ചിത്രത്തിന്റെ മോഷൻ പോസ്റ്ററിന് വലിയ സ്വീകരണമായിരുന്നു ലഭിച്ച‌ത്.