തമിഴകത്ത് മെഗാഹിറ്റായി മാറിയ ‘കോ’ ഹിന്ദിയിലേക്ക് റീമേക്ക് ചെയ്യുന്നു. അക്ഷയ് കുമാര്‍ താല്‍പ്പര്യമെടുത്താണ് ചിത്രം റീമേക്ക് ചെയ്യുന്നത്. ആന്‍റണി ഡിസില്‍‌വ സംവിധാനം ചെയ്യുന്ന ചിത്രത്തില്‍ നായകവേഷത്തില്‍ അക്ഷയ് എത്തും. ‘കോ’യിലെ നായികയായ കാര്ത്തിക തന്നെ ഹിന്ദി പതിപ്പിലും അഭിനയിക്കുമെന്നാണ് സൂചന.
റിലീസായി ആദ്യ രണ്ടു ദിനങ്ങളില്‍ തന്നെ അഞ്ചുകോടി രൂപ ഗ്രോസ് നേടിയ സിനിമ മുടക്കുമുതലിന്‍റെ പലമടങ്ങ് തിരിച്ചുപിടിക്കുമെന്നാണ് സൂചന. മുംബൈയില്‍ വച്ച് ‘കോ’ കണ്ട അക്ഷയ് കുമാര്‍ ഉടന്‍ തന്നെ സംവിധായകന്‍ കെ വി ആനന്ദിനെ വിളിച്ച് അഭിനന്ദനമറിയിച്ചു. റീമേക്ക് റൈറ്റ് തനിക്ക് തരണമെന്നും അക്ഷയ് അഭ്യര്‍ത്ഥിക്കുകയായിരുന്നു. മൂന്നാറില്‍ തന്‍റെ അടുത്ത ചിത്രത്തിന്‍റെ പണിപ്പുരയിലായിരുന്ന ആനന്ദ് ഇതിന് സമ്മതം നല്‍കി.
ഒരു പ്രസ് ഫോട്ടോഗ്രാഫറുടെ സംഘര്‍ഷഭരിതമായ ജീവിതം കൊമേഴ്സ്യല്‍ ചേരുവകളെല്ലാം ചേര്‍ത്ത് അവതരിപ്പിച്ചിരിക്കുന്നതിലെ ക്രാഫ്ടാണ് അക്ഷയ് കുമാറിനെ ആകര്‍ഷിച്ചത്. അക്ഷയിന്‍റെ നിര്‍മ്മാണ കമ്പനിയായ ഹരി ഓം മൂവീസായിരിക്കും കോ ഹിന്ദിയില്‍ നിര്‍മ്മിക്കുക.
ഹിന്ദി പതിപ്പ് സംവിധാനം ചെയ്യുന്ന ആന്‍റണി ഡിസില്‍‌വ അക്ഷയ് കുമാറിന്‍റെ അടുത്ത സുഹൃത്താണ്. അക്ഷയിനെ നായകനാക്കി ‘ബ്ലൂ’ എന്ന പരാജയചിത്രം സംവിധാനം ചെയ്തത് ആന്‍റണി ഡിസില്‍‌വയാണ്.
