അതേസമയം ലീഗിന്‍റെ തെരഞ്ഞെടുപ്പ് വിഷയങ്ങളില്‍ പ്രധാനപ്പെട്ട ഒന്നാണ് അലിഗഡ് മുസ്ലിം യൂണിവേഴ്സിറ്റി കാമ്പസ്. ഇതിന്‍റെ പേരില്‍ ശക്തമായ പ്രക്ഷോഭം നടത്താനാണ് ലീഗിന്‍റെ തീരുമാനം. ഇത്തരമൊരു പ്രക്ഷോഭം നടത്തുന്നതിലൂടെ മലപ്പുറത്തെ ഭൂരിപക്ഷ വിഭാഗമായ മുസ്ലിംകളുടെ വോട്ട് നേടാന്‍ കഴിയുമെന്നാണ് ലീഗ് കരുതുന്നത്.
കഴിഞ്ഞ ഒന്നര മാസത്തോളമായി ഇതിന്‍റെ പേരില്‍ മലപ്പുറം കളക്ടറേറ്റ് പടിക്കല്‍ സമരം നടത്തിക്കൊണ്ടിരിക്കുകയാണ്. ഇത്തരമൊരു വിഷയമാകുമ്പോള്‍ വിഘടിച്ചു നില്‍ക്കുന്ന എല്ലാ മുസ്ലിം സംഘടനകളും ഒന്നിക്കുമെന്നാണ് ലീഗ് കരുതുന്നത്.
നിയമസഭാമണ്ഡലങ്ങളായ ബേപ്പൂര്‍, കുന്ദമംഗലം, വണ്ടൂര്‍, നിലമ്പൂര്‍, മഞ്ചേരി, മലപ്പുറം, കൊണ്ടോട്ടി എന്നീ പ്രദേങ്ങളായിരുന്നു പഴയ മഞ്ചേരി ലോക്സഭാ മണ്ഡലത്തിനു കീഴില്‍ ഉണ്ടായിരുന്നത്. പിന്നീട് മലപ്പുറം മണ്ഡലമാക്കി മാറ്റിയപ്പോള്‍ ബേപ്പൂര്‍, കുന്ദമംഗലം, നിലമ്പൂര്‍, വണ്ടൂര്‍ എന്നിവയ്ക്ക് പകരം മങ്കട, പെരിന്തല്‍മണ്ണ, വേങ്ങര, വള്ളിക്കുന്ന് എന്നിവ കൂട്ടിച്ചേര്‍ത്തു.
