നാടന്‍പാട്ടും മുടിയാട്ടവും പടപ്പാട്ടുകളും എടനാടന്‍ പാട്ടുകളും കുത്തുപാട്ടുകളും ചാവുപാട്ടുകളും ചാറ്റുകളും പഴയ ശീലങ്ങളോടെയും ശീലക്കേടുകളോടെയും മറിയാമ്മ ചേട്ടത്തില്‍ നിന്ന്‌ ഒഴുകി എത്തി.
ഓര്‍മ്മയില്‍ നിന്ന്‌ ചികഞ്ഞെടുത്ത്‌ പാട്ടുകള്‍ അവതരിപ്പിച്ചതിനൊപ്പം നാടന്‍ പാട്ടുകള്‍ തയ്യാറാക്കുന്നതിലും മികവുകാട്ടി. നാടന്‍പാട്ടുകളെ കുറിച്ച്‌ നിരവധി കോളെജുകളില്‍ ക്ലാസുകള്‍ എടുത്തു. സിനിമക്കും വേണ്ടിയും പാട്ടുപാടി.
കേരള ഫോക്ക്‌ലോര്‍ അക്കാദമി ഫെല്ലോഷിപ്പ്‌ നല്‌കിയാണ്‌ ഇവരെ ആദരിച്ചത്‌. കേരളസംഗീത നാടക അക്കാദമിയും ആദരിച്ചു. ഫെഡറേഷന്‍ ഓഫ്‌ ഫിലിം സൊസൈറ്റീസ്‌ ഓഫ്‌ ഇന്ത്യയുടെ ജോണ്‍ എബ്രഹാം പുരസ്കാരവും മറിയാമ്മ ചേട്ടത്തിക്ക്‌ സമര്‍പ്പിക്കപ്പെട്ടു.
പാരമ്പര്യം മറന്നു കളഞ്ഞില്ല എന്നതായിരുന്ന മറിയാമ്മ ചേട്ടത്തിയുടെ പ്രസക്തി. സമ്പന്നമായ വായ്‌മൊഴി ചരിത്രങ്ങള്‍ പകര്‍ന്നു നല്‌കുക എന്ന ദൗത്യം നിറവേറ്റാന്‍ അവര്‍ക്കായി.
മുഖ്യധാരയിലേക്ക്‌ എത്താന്‍ ഭാഗ്യം സിദ്ധിച്ചതാണ്‌ മറിയാമ്മ ചേട്ടത്തിയുടെ പാരമ്പര്യ അറിവിനെ പ്രസക്തമാക്കിയത്‌. അല്ലെങ്കില്‍ അവ വെറും പണിപ്പാട്ടുമാത്രമായി പോകുമായിരുന്നു. യുഗങ്ങള്‍ നീണ്ട കീഴാള ജീവിത്തിന്‍റെ അതിജീവന വഴികള്‍ പറഞ്ഞു തരാന്‍ ഒരു മറിയാമ്മ ചേട്ടത്തി മാത്രമേ നമുക്ക്‌ ഉണ്ടായിട്ടുള്ളു എന്നതും വാസ്‌തവമാണ്‌.
സജീവമായ അതിജീവന പാരമ്പര്യങ്ങള്‍ ലോകമറിയാതെ പോയത്‌ എന്തുമാത്രമായിരിക്കും എന്നും ചിന്തിക്കേണ്ടിയിരിക്കുന്നു.
