മുംബൈ|
jibin|
Last Updated:
വെള്ളി, 12 ഓഗസ്റ്റ് 2016 (21:04 IST)
ഇന്ത്യന്‍ ക്രിക്കറ്റ് ടീമില്‍ നിന്ന് ഉടന്‍ വിരമിക്കില്ലെന്ന് സൂപ്പര്‍ താരം മഹേന്ദ്ര സിംഗ് ധോണി. താന്‍ ഇപ്പോഴും ക്രിക്കറ്റ് കളിച്ചുകൊണ്ടിരിക്കുകയാണ്. കളി ആസ്വദിക്കാനും സാധിക്കുന്നതിനാല്‍ അതില്‍ ശ്രദ്ധകേന്ദ്രീകരിക്കാനാണ് തീരുമാനമെന്നും ധോണി വ്യക്തമാക്കി.
ക്രിക്കറ്റ് കളിച്ച് തുടങ്ങിയ സമയത്ത് ഇന്ത്യക്ക് വേണ്ടി കളിക്കാന്‍ കഴിയുമെന്ന് താന്‍ വിചാരിച്ചിരുന്നില്ല. എല്ലാവര്‍ക്കും കുടുംബത്തില്‍ നിന്നോ സുഹൃത്തുക്കളില്‍ നിന്നോ പ്രചോദനം ലഭിച്ചിട്ടുണ്ടാകും. എന്നാല്‍ എനിക്ക് രാജ്യമാണ് ഏറ്റവും വലിയ പ്രചോദനമെന്നും ധോണി പറഞ്ഞു.
കഴിഞ്ഞ കാലത്തെക്കുറിച്ചോ വരും കാലത്തെക്കുറിച്ചോ ആധികം ചിന്തിക്കാറില്ലാത്ത ഞാന്‍ വര്‍ത്തമാനകാലത്തിലാണ് വിശ്വസിക്കുന്നത്. എന്റെ കഴിഞ്ഞ കാലങ്ങളില്‍ നിന്ന് ഞാന്‍ പഠിക്കാറുണ്ട്. അതുപോലെ ഒരാള്‍ക്ക് ഭാവിയിലേക്ക് സ്വപ്‌നങ്ങള്‍ ഉണ്ടാവുകയും വേണം. പക്ഷെ ഏറ്റവും പ്രധാനം വര്‍ത്തമാനകാലമാണെന്നും ഇന്ത്യന്‍ നായകന്‍ പറഞ്ഞു.
ധോണിയുടെ ജീവിതം ആസ്പദമാക്കി ചിത്രീകരിച്ച എം എസ് ധോണി ദ അണ്‍ടോള്‍ഡ് സ്‌റ്റോറി എന്ന ചിത്രത്തിന്റെ ട്രെയിലര്‍ പുറത്തിറക്കിയ ചടങ്ങിലാണ് താരം മനസ് തുറന്നത്.
