ജയ് ശ്രീറാം വിളിച്ചുകൊണ്ട് നെറ്റിയില്‍ കുറിയിട്ട് ഇംഗ്ലണ്ട് മുന്‍ ക്രിക്കറ്റ് താരം കെവിന്‍ പീറ്റേഴ്‌സണ്‍ പങ്കുവെച്ച ചിത്രത്തിന് കീഴില്‍ ഇന്ത്യന്‍ താരങ്ങളായ രോഹിത് ശര്‍മയെയും എം എസ് ധോനിയെയും രൂക്ഷഭാഷയില്‍ വിമര്‍ശിച്ച് ഇന്ത്യന്‍ ആരാധകര്‍. നെറ്റിയില്‍ കുറിയിട്ടുകൊണ്ടുള്ള ചിത്രത്തിന് കീഴില്‍ ജയ് ശ്രീറാം എന്നെഴുതിയാണ് താരം ഇന്‍സ്റ്റഗ്രാമില്‍ പങ്കുവെച്ചത്. ഇതോടെ ഇന്ത്യന്‍ താരങ്ങളാരും പരസ്യമായി ജയ് ശ്രീറാം എന്ന് വിളിക്കാന്‍ പോലും തയ്യാറായില്ലെന്നും അവരെല്ലാം പീറ്റേഴ്‌സണിനെ കണ്ടുപഠിക്കണമെന്നും പറഞ്ഞ് ഒരു വിഭാഗം ആരാധകര്‍ രംഗത്ത് വരികയായിരുന്നു.

അയോധ്യയില്‍ 22ന് നടന്ന രാമക്ഷേത്രത്തിന്റെ പ്രാണപ്രതിഷ്ടാ ചടങ്ങില്‍ ക്ഷണം ലഭിച്ചിരുന്നെങ്കിലും ഇന്ത്യന്‍ താരങ്ങളായ രോഹിത് ശര്‍മ,വിരാട് കോലി, മുന്‍ നായകന്‍ എം എസ് ധോനി എന്നിവര്‍ ചടങ്ങില്‍ പങ്കെടുത്തിരുന്നില്ല. സമൂഹമാധ്യമങ്ങളിലും ഇത് സംബന്ധിച്ച പോസ്റ്റുകളൊന്നും ഇവര്‍ പങ്കുവെച്ചിരുന്നില്ല. ഇതാണ് ഒരു വിഭാഗത്തെ ചൊടുപ്പിച്ചത്. നിലവിലെ ഇന്ത്യന്‍ താരങ്ങളില്‍ രവീന്ദ്ര ജഡേജ മാത്രമായിരുന്നു ചടങ്ങില്‍ പങ്കെടുത്തത്. ഇംഗ്ലണ്ടിനെതിരായ ടെസ്റ്റ് മത്സരത്തിന്റെ ഭാഗമായാണ് രോഹിത് മാറിനിന്നതെന്ന് വിശദീകരണമുണ്ടെങ്കിലും അപ്പോള്‍ ജഡേജ എങ്ങനെ പങ്കെടുത്തു എന്ന ചോദ്യമാണ് ആരാധകര്‍ ചോദിക്കുന്നത്. കോലി ചടങ്ങില്‍ പങ്കെടുക്കുമെന്ന് വാര്‍ത്തകള്‍ ഉണ്ടായിരുന്നെങ്കിലും വ്യക്തിപരമായ കാരണങ്ങള്‍ കാരണം വിട്ടുനില്‍ക്കുകയായിരുന്നു. അതേസമയം എം എസ് ധോനി പങ്കെടുക്കാത്തതിന്റെ കാരണം ഇതുവരെയും വ്യക്തമായിട്ടില്ല.