Last Modified തിങ്കള്‍, 11 ഏപ്രില്‍ 2016 (17:56 IST)
മലയാളത്തിലെ എക്കാലത്തെയും വലിയ വിജയ കൂട്ടുകെട്ടുകളില്‍ ഒന്നായ ഷാജി കൈലാസ് - രണ്‍ജി പണിക്കര്‍ ടീം വീണ്ടും വരുന്നു. വര്‍ഷങ്ങളുടെ ഇടവേളയ്ക്ക് ശേഷം ഷാജിയും രണ്‍ജിയും ഒന്നിക്കുന്ന ചിത്രത്തില്‍ മോഹന്‍ലാല്‍ നായകനാകുമെന്നാണ് വിവരം.
ഈ ചിത്രത്തിന്‍റെ തിരക്കഥാരചനയിലാണ് ഇപ്പോള്‍ രണ്‍ജി പണിക്കര്‍. അഭിനയത്തിന്‍റെ തിരക്കുള്ളതിനാല്‍ കിട്ടുന്ന ഇടവേളകളിലെല്ലാം രണ്‍ജി പണിക്കര്‍ ഈ സിനിമയുടെ തിരക്കഥയെഴുതുകയാണെന്നാണ് വിവരം.
ദി കിംഗ് ആന്‍റ് ദി കമ്മീഷണര്‍ ആയിരുന്നു ഷാജി - രണ്‍ജി ടീമില്‍ നിന്ന് ഒടുവില്‍ പുറത്തുവന്ന സിനിമ. ഡല്‍ഹി രാഷ്ട്രീയം ചര്‍ച്ച ചെയ്ത ആ ചിത്രം പരാജയപ്പെട്ടു. എന്തായാലും ഷാജി - രണ്‍ജി - മോഹന്‍ലാല്‍ കൂട്ടുകെട്ടില്‍ പുറത്തിറങ്ങുന്ന ചിത്രം കേരളത്തിന്‍റെ പശ്ചാത്തലത്തിലായിരിക്കും എന്നാണ് അറിയുന്നത്.
ഇത് രണ്ടാം തവണയാണ് രണ്‍ജി പണിക്കര്‍ മോഹന്‍ലാല്‍ ചിത്രത്തിനായി തൂലിക ചലിപ്പിക്കുന്നത്. ജോഷി സംവിധാനം ചെയ്ത ‘പ്രജ’ ആണ് ആദ്യചിത്രം. അത് ബോക്സോഫീസില്‍ വലിയ ചലനം ഉണ്ടാക്കിയില്ല.
ഷാജിയുമൊത്തുള്ള ചിത്രത്തിന് ശേഷം ജോഷിക്ക് വേണ്ടിയും രണ്‍ജി പണിക്കര്‍ എഴുതുന്നുണ്ട്. അത് ‘ലേലം’ എന്ന മെഗാഹിറ്റിന്‍റെ രണ്ടാം ഭാഗമായിരിക്കുമെന്നാണ് സൂചന. എന്നാല്‍ പുതിയ മദ്യനയത്തിന്‍റെ പശ്ചാത്തലത്തില്‍ ലേലത്തിന്‍റെ രണ്ടാം ഭാഗം എങ്ങനെയെടുക്കുമെന്ന ആശയക്കുഴപ്പം നിലനില്‍ക്കുന്നുണ്ടെന്നും അറിയുന്നു.
