നിവിൻ പോളിയുടെ സിനിമകൾ പ്രഖ്യാപിക്കുമ്പോൾ മുതൽ വാർത്തകളിൽ നിറഞ്ഞുനിൽക്കുന്ന കാലമാണിത്. ആ ചിത്രം സംവിധാനം ചെയ്യുന്നതാര്, പടത്തിൻറെ പേരെന്ത്, നായികയാര് തുടങ്ങി എല്ലാക്കാര്യങ്ങളും ചർച്ച ചെയ്യപ്പെടുന്നു. നിവിൻ പോളി സിനിമകളുടെ ഭാഗമാകാൻ മറ്റ് താരങ്ങൾ ആഗ്രഹിക്കുന്നതും മറ്റൊന്നുംകൊണ്ടല്ല. നായികമാരുടെ കാര്യമാണെങ്കിൽ, നിവിൻറെ നായികയാകാൻ മത്സരം തന്നെയാണ് മോളിവുഡിൽ നടക്കുന്നത്.

സിദ്ധാർത്ഥ് ശിവ സംവിധാനം ചെയ്യുന്ന പുതിയ സിനിമയിൽ നിവിൻ പോളിയാണ് നായകൻ. വിദ്യാർത്ഥി രാഷ്ട്രീയം പ്രമേയമാകുന്ന ചിത്രത്തിൽ ഒരു വിദ്യാർത്ഥി പ്രസ്ഥാനത്തിൻറെ നേതാവായാണ് നിവിൻ വേഷമിടുന്നത്. ചിത്രത്തിൽ നമിത പ്രമോദും രമ്യ നമ്പീശനും നായികമാരായുണ്ടാകുമെന്ന് ഉറപ്പായി. മൂന്നാമതൊരു നായിക കൂടിയുണ്ടെങ്കിലും അതാരാവണമെന്ന കാര്യത്തിലിതുവരെ തീരുമാനമായിട്ടില്ല. നവാഗതനായ ബി രാകേഷിൻറേതാണ് തിരക്കഥ.

യൂണിവേഴ്‌സൽ സിനിമ നിർമ്മിക്കുന്ന ഈ സിനിമയുടെ ഷൂട്ടിംഗ് സെപ്റ്റംബർ 26ന് ആരംഭിക്കും. ലാൽ ജോസ് ചിത്രത്തിനായി മാറ്റിവച്ചിരുന്ന ഡേറ്റാണ് നിവിൻ പോളി സിദ്ധാർത്ഥ് ശിവയ്ക്ക് നൽകിയിരിക്കുന്നത്. ലാൽ ജോസിൻറെ സിനിമയുടേ പ്രീപ്രൊഡക്ഷൻ ജോലികൾ തീരാൻ ഇനിയും സമയമെടുക്കും.

ലഭിക്കുന്ന വിവരങ്ങൾ അനുസരിച്ച്, നിവിൻ പോളിയുടെ കരിയറിലെ ഏറ്റവും ശക്തമായ കഥാപാത്രമായിരിക്കും സിദ്ധാർത്ഥ് ശിവയുടെ സിനിമയിലേത്. നിവിനും സിദ്ധാർത്ഥ് ശിവയും 'പുതിയ തീരങ്ങൾ' എന്ന ചിത്രത്തിൽ ഒരുമിച്ച് അഭിനയിച്ചിട്ടുണ്ട്. ആ ചിത്രത്തിലെ നായികയായിരുന്നു നമിത പ്രമോദ്.

രമ്യ നമ്പീശൻ രണ്ടു ചിത്രങ്ങളിൽ നിവിൻ പോളിക്കൊപ്പം അഭിനയിച്ചിട്ടുണ്ട്. ഇംഗ്ലീഷ്, അരികിൽ ഒരാൾ എന്നീ സിനിമകളിൽ. പക്ഷേ, രണ്ടിലും നിവിൻറെ നായികയായിരുന്നില്ല രമ്യ.