ദിലീപ്- കാവ്യ മാധവന്‍ ജോഡി ആദ്യമായി ഒന്നിച്ചഭിനയിച്ച സിനിമയാണ് 1999ല്‍ പുറത്തിറങ്ങിയ ചന്ദ്രനുദിക്കുന്ന ദിക്കില്‍. ലാല്‍ ജോസ് സംവിധാനം ചെയ്ത സിനിമയെ ഇരുകയ്യും നീട്ടികൊണ്ടാണ് മലയാളികള്‍ സ്വീകരിച്ചത്. ബാലതാരമായി സിനിമയിലെത്തിയ കാവ്യ മാധവന്റെ നായികയായുള്ള ആദ്യ സിനിമ കൂടിയായിരുന്നു ചന്ദ്രനുദിക്കുന്ന ദിക്കില്‍.

ഇപ്പോഴിതാ സിനിമയില്‍ ദിലീപിന്റെ നായികയായി ആദ്യം തീരുമാനിച്ചത് ശാലിനിയെയായിരുന്നുവെന്നും കാവ്യ മാധവനെ നായികയാക്കാന്‍ നിര്‍ദേശിച്ചത് മഞ്ജുവാര്യരായിരുന്നുവെന്നും വ്യക്തമാക്കിയിരിക്കുകയാണ് സംവിധായകന്‍ ലാല്‍ ജോസ്. ഒരു സ്വകാര്യ ചാനലിന് നല്‍കിയ അഭിമുഖത്തിലാണ് ലാല്‍ ജോസ് ഇക്കാര്യം വ്യക്തമാക്കിയത്.

ചന്ദ്രനുദിക്കുന്ന ദിക്കില്‍ എന്ന സിനിമയ്ക്കായി കാസ്റ്റിംഗ് പൂര്‍ത്തിയാക്കിയിരുന്നു. ദിലീപിന്റെ നായികയായി ശാലിനിയെയാണ് നിശ്ചയിച്ചിരുന്നത്. മറ്റ് കഥാപാത്രങ്ങളെയും തീരുമാനിച്ചിരുന്നു. എന്നാല്‍ ആ സമയത്ത് ശാലിനി നിറം എന്ന സിനിമയുടെ തിരക്കിലായിരുന്നു. ഡേറ്റ് പ്രശ്‌നങ്ങള്‍ മൂലം മറ്റൊരു നായികയെ കണ്ടെത്തേണ്ടി വന്നു. ശാലിനിക്ക് പകരം ആരെ അഭിനയിപ്പിക്കും എന്ന കാര്യം ആലോചിക്കേണ്ടി വന്നു. മഞ്ജുവാര്യരാണ് പുതിയ ആരെയെങ്കിലും നായികയാക്കാം എന്ന നിര്‍ദേശം മുന്നോട്ട് വെച്ചത്. പെട്ടെന്ന് കാവ്യയുടെ കാര്യം ഓര്‍മ വന്നു. ഉടന്‍ തന്നെ നീലേശ്വരത്ത് കാവ്യയുടെ വീട്ടില്‍ പോയി. അവരെ കണ്ട് കാര്യം പറഞ്ഞ് മനസിലാക്കി. കാവ്യ സമ്മതിക്കുകയും ചെയ്തു. ലാല്‍ ജോസ് പറഞ്ഞു.