നവാഗതനായ ജിതിന്‍ കെ ജോസ് ഒരുക്കുന്ന പുതിയ സിനിമയിലും മമ്മൂട്ടി എത്തുക നെഗറ്റീവ് ടച്ചുള്ള റോളിലെന്ന് റിപ്പോര്‍ട്ട്. മമ്മൂട്ടി കമ്പനി നിര്‍മിക്കുന്ന സിനിമയില്‍ നടന്‍ വിനായകനും സിനിമയില്‍ ഒരു പ്രധാന റോളിലെത്തുമെന്ന് റിപ്പോര്‍ട്ടുകളുണ്ട്. നേരത്തെ റോഷാക്, ഭ്രമയുഗം എന്നീ സിനിമകളില്‍ നെഗറ്റീവ് ടച്ചുള്ള കഥാപാത്രങ്ങളെയാണ് മമ്മൂട്ടി അവതരിപ്പിച്ചത്.

മമ്മൂട്ടിയ്‌ക്കൊപ്പം തന്നെ പ്രാധാന്യമുള്ള വേഷമാകും വിനായകനും സിനിമയിലെന്നാണ് സൂചന. കുറുപ്പ് എന്ന ദുല്‍ഖര്‍ സല്‍മാന്‍ സിനിമയുടെ സഹരചയിതാവ് കൂടിയാണ് ജിതിന്‍ കെ ജോസ്. നേരത്തെ പൃഥ്വിരാജ്, ജോജു ജോര്‍ജ് എന്നിവരെ പരിഗണിച്ച വേഷത്തിലേക്കാണ് വിനായകനെ ഇപ്പോള്‍ പരിഗണിക്കുന്നത്. സിനിമയുടെ ചിത്രീകരണം ഉടന്‍ തന്നെ നാഗര്‍കോവിലില്‍ ആരംഭിക്കും. രണ്ടാഴ്ചയ്ക്ക് ശേഷമാകും മമ്മൂട്ടി സിനിമയില്‍ ജോയിന്‍ ചെയ്യുക.

കണ്ണൂര്‍ സ്‌ക്വാഡ് എന്ന സിനിമയുടെ സംവിധായകനായ റോബി വര്‍ഗീസ് രാജ് ആണ് സിനിമയുടെ ഛായാഗ്രഹണം. ക്രൈം ത്രില്ലറായി ഒരുങ്ങുന്ന സിനിമയ്ക്ക് സംഗീതം ഒരുക്കുക സുഷിന്‍ ശ്യാമാണ്.