മലയാളികളെല്ലാം തന്നെ കാത്തിരിക്കുന്ന സിനിമ എന്നത് വല്ലപ്പോഴും സംഭവിക്കുന്ന ഒന്നാണ്. 2018 എന്ന സിനിമയ്ക്ക് ശേഷം ഒരു നടനോടുള്ള ഇഷ്ടം എന്ന ഫാക്ടര്‍ നോക്കാതെ മലയാളികളെല്ലാം കാത്തിരിക്കുന്നത് ആടുജീവിതത്തിലെ നജീബിനെ സ്‌ക്രീനില്‍ കാണാനായാണ്. ബ്ലെസിയുടെ സംവിധാനത്തില്‍ പൃഥ്വിരാജ് നായകനാകുന്ന സിനിമ ഒരു പാന്‍ ഇന്ത്യന്‍ റിലീസിങ്ങിനാണ് തയ്യാറെടുക്കുന്നത്. 28ന് സിനിമ റിലീസാകുന്നതിന് മുന്നോടിയായി സിനിമയുടെ പ്രീ ബുക്കിങ് നേരത്തെ തന്നെ ആരംഭിച്ചിരിക്കുന്നു. റിലീസിന് ഇനി 2 നാളുകള്‍ മാത്രം ബാക്കിനില്‍ക്കെ ആടുജീവിതം ബുക്കിങ്ങിലൂടെ എത്ര കോടി സ്വന്തമാക്കിയെന്ന് നോക്കാം.

കേരളത്തിലെ മിക്ക സെന്ററുകളിലും അതിവേഗത്തിലാണ് ഷോകള്‍ ഫില്ലാകുന്നത്. അഡ്വാന്‍സ് ബുക്കിങ്ങിലൂടെ മാത്രം ഇതിനകം 2 കോടിയിലധികം രൂപ കേരളത്തില്‍ നിന്നും സിനിമ നേടികഴിഞ്ഞു. 2 ദിവസം കൂടി റിലീസിന് ഉള്ളതിനാല്‍ ഇത് ഇനിയും ഉയരുമെന്ന കാര്യം ഉറപ്പാണ്. ഇതര സംസ്ഥാനങ്ങളിലും മികച്ച ബുക്കിങ്ങ് തന്നെയാണ് സിനിമയ്ക്ക് ലഭിക്കുന്നത്. ഇന്ത്യയിലും വിദേശത്തുമായി മികച്ച സ്‌ക്രീന്‍ കൗണ്ടും ആടുജീവിതത്തിനുണ്ട്. നിലവില്‍ ലോകമെങ്ങും നിന്നായി 4 കോടിയിലധികം രൂപയുടെ പ്രീ സെയിലാണ് സിനിമയ്ക്ക് ഉണ്ടായിട്ടുള്ളത്. അതിനാല്‍ തന്നെ ആദ്യ ദിനത്തില്‍ മികച്ച പ്രതികരണം നേടിയാല്‍ സിനിമ മറ്റൊരു തലത്തില്‍ തന്നെ ശ്രദ്ധികപ്പെടും. സിനിമയില്‍ എ ആര്‍ റഹ്മാന്‍ ചെയ്ത ഗാനങ്ങള്‍ ഇതിനകം ശ്രദ്ധ നേടികഴിഞ്ഞു. അമല പോളാണ് സിനിമയില്‍ പൃഥ്വിരാജിന്റെ നായികയാകുന്നത്.