rahul balan|
Last Modified വ്യാഴം, 2 ജൂണ്‍ 2016 (14:53 IST)
നിരവധി ഹാസ്യ കഥാപാത്രങ്ങളിലൂടെ മലയാളക്കരയുടെ ശ്രദ്ധ പിടിച്ചുപറ്റിയ താരമാണ് സൗബിന്‍ ഷാഹിര്‍. അഭിനയത്തിന് പുറമെ മറ്റൊരു മേഖലയില്‍ക്കൂടി കഴിവ് തെളിയിക്കാന്‍ ഒരുങ്ങുകയാണ് സൌബിന്‍. സൗബിന്‍ സംവിധാനം ചെയ്യുന്ന ആദ്യ ചിത്രമായ പറവയുടെ ഷുട്ടിങ്ങ്‌ തുടങ്ങി. ചിത്രത്തിന്റെ കഥയും സൗബിനാണ്‌ എഴുതിയിരിക്കുന്നത്‌.
അന്‍വര്‍ റഷീദ്‌ എന്റര്‍ടൈന്‍മെന്റിന്‍റെ ബാനറില്‍ അന്‍വര്‍ റഷീദും ദി മൂവി ക്ലബ്ബിന്‍റെ ബാനറില്‍ ഷൈജു ഉണ്ണിയും ചേര്‍ന്നാണ്‌ ചിത്രം നിര്‍മിക്കുന്നത്‌. ചിത്രത്തിലെ പ്രധാനപ്പെട്ട വേഷങ്ങള്‍ ചെയ്യുന്നത് പുതുമുഖങ്ങളാവും. അമല്‍ നീരദിന്‍റെയും അന്‍വര്‍ റഷീദിന്‍റെയും സംരംഭമായ ‘എ ആന്റ്‌ എ’ റിലീസിനാണ് പറവയുടെ വിതരണച്ചുമതല.
സൗബിനൊപ്പം മുനീര്‍ അലിയും നിസാം ബഷീറും ചേര്‍ന്നാണ്‌ തിരക്കഥ തയ്യാറാക്കിയിരിക്കുന്നത്‌.
ഉദ്ഘാടനച്ചടങ്ങില്‍ ഫഹ്ദ് ഫാസിലടക്കം മലയാള ചലച്ചിത്രരംഗത്തെ നിരവധി പ്രമുഖര്‍ പങ്കെടുത്തു.
