താന്‍ സിങ്കം റിട്ടേണ്‍സിലെ നായികയായത് അതൊരു രോഹിത് ഷെട്ടി ചിത്രം ആയതിനാലാണെന്ന് ബോളിവുഡ് സൂപ്പര്‍ നായിക കരീന കപൂര്‍. നായകനായ അജയ് ദേവ്ഗണിന് മാത്രമല്ല, തനിക്കും തുല്യപ്രാധാന്യമുള്ള കഥാപാത്രത്തെയാണ് സിങ്കം റിട്ടേണ്‍സില്‍ ലഭിച്ചതെന്നും കരീന പറയുന്നു.

"എന്നെ സംബന്ധിച്ച് ഈ തലമുറയിലെ മന്‍‌മോഹന്‍ ദേശായിയാണ് രോഹിത് ഷെട്ടി. ഏത് നടിക്കാണ് അദ്ദേഹത്തിനൊപ്പം ജോലി ചെയ്യാന്‍ ആഗ്രഹമില്ലാത്തത്? എന്‍റെ കരിയറിലെ ഏറ്റവും വലിയ രണ്ടുഹിറ്റുകള്‍ അദ്ദേഹത്തിന്‍റെ സംഭാവനയാണ്. മൂന്നാമത്തേത് വന്നുകൊണ്ടിരിക്കുന്നു" - കരീന പറയുന്നു. സിങ്കം റിട്ടേണ്‍സ് ഓഗസ്റ്റ് 15നാണ് റിലീസാകുന്നത്. ചിത്രത്തിന്‍റെ ട്രെയിലര്‍ വെള്ളിയാഴ്ച പുറത്തിറങ്ങി.

"സിങ്കം റിട്ടേണ്‍സിലെ എന്‍റെ കഥാപാത്രം രോഹിത് ഷെട്ടി എനിക്കുവേണ്ടി മാത്രം സൃഷ്ടിച്ചതാണ്. ഞാന്‍ ഈ സിനിമയുടെ ഭാഗമായത് ഇതൊരു രോഹിത് ഷെട്ടി ചിത്രമായതുകൊണ്ടുമാത്രമാണ്. ഞാന്‍ അദ്ദേഹത്തിന്‍റെ ഫാനാണ്" - കരീന വ്യക്തമാക്കി.

"ഈ സിനിമയില്‍ കോമഡിയുമുണ്ട്. അത് ചെയ്യാന്‍ ബുദ്ധിമുട്ടുമായിരുന്നു. രോഹിത് ഷെട്ടിക്കും അജയ് ദേവ്ഗണിനുമൊപ്പം ഞാന്‍ മുമ്പും ജോലി ചെയ്തിട്ടുണ്ട്. അതുകൊണ്ട് എനിക്കിതൊരു കുടുംബം പോലെയായിരുന്നു. ഈ സിനിമയുടെ ആദ്യഭാഗത്തേക്കാള്‍ വലിയ വിജയമായി സിങ്കം റിട്ടേണ്‍സ് മാറും" - കരീന പ്രതീക്ഷ പുലര്‍ത്തുന്നു.

ഒരു മഹാരാഷ്ട്രക്കാരി പെണ്‍കുട്ടിയായാണ് സിങ്കം റിട്ടേണ്‍സില്‍ കരീന അഭിനയിക്കുന്നത്. "ഞാന്‍ നല്ല ഒഴുക്കോടെ ഈ സിനിമയില്‍ മറാത്തി പറയുന്നുണ്ട്. എന്‍റേത് ഒരു ഫണ്‍ ക്യാരക്ടറാണ് ഈ ചിത്രത്തില്‍"- കരീന വെളിപ്പെടുത്തി.