ബ്രിട്ടീഷ് പാര്‍ലമെന്‍റിലേക്ക് ഇംഗ്ളണ്ടില്‍ നിന്ന് മത്സരിച്ചു ജയിച്ച ആദ്യത്തെ ഭാരതീയനും ഏഷ്യക്കാരനുമാണ് ദാദാബായി നവറോജി.
ഇന്ത്യയുടെ സ്വാതന്ത്ര്യത്തിനു വേണ്ടി നാട്ടിലും ഇംഗ്ളണ്ടിലും അക്ഷീണം പോരാടിയ ദാദാബായി അറിയപ്പെടുന്നത് ഇന്ത്യയുടെ മഹാനായ വൃദ്ധന്‍ എന്ന പേരിലാണ്.
1825 സെപ്തംബര്‍ 4 ന് ബോംബയിലാണ് അദ്ദേഹം ജനിച്ചത് - അന്തോര്‍ന്നന്‍ പാഴ്സി പുരോഹിതന്‍റെ മകനായി.
നവറോജി പാലന്‍ജി ദോര്‍ദിയും മനേക് ബായിയും ആയിരുന്നു മാതാപിതാക്കള്‍. നാലാം വയസ്സില്‍ അച്ഛന്‍ മരിച്ചതോടെ കുടുംബം ദാരിദ്ര്യത്തിലായിരുന്നു. അമ്മ വളരെ കഷ്ടപ്പെട്ടാണ് ദാദാബായിയെ വളര്‍ത്തിയത്. പതിനൊന്നാം വയസ്സില്‍ അദ്ദേഹം ഗുലാബിയെ വിവാഹം കഴിച്ചു.
എല്‍ഫിംഗ്സ്റ്റണ്‍ ഇന്‍സ്റ്റിറ്റൂട്ടിന്‍റെ സ്കൂളിലായിരുന്നു വിദ്യാഭ്യാസം. ഇത് അദ്ദേഹത്തിന്‍റെ ജീവിതത്തിലൊരു വഴിത്തിരിവായിരുന്നു. അവിടെ അദ്ധ്യാപകനായി ജോലി ലഭിച്ച നവറോജി ഇരുപത്തഞ്ചാം വയസ്സില്‍ അസിസ്റ്റന്‍റ് പ്രൊഫസറും ഇരുപത്തേഴാം വയസ്സില്‍ (1855) കണക്കിന്‍റെയും നാച്വറല്‍ ഫിലോസഫിയുടെയും പ്രൊഫസറുമായി പ്രവര്‍ത്തിച്ചു.
1867 ലാണ് അദ്ദേഹം രാഷ്ട്രീയത്തിലാകൃഷ്ടനായത്. 1874 ല്‍ അദ്ദേഹം ബറോഡാ രാജാവിന്‍റെ പ്രധാനമന്ത്രിയായി പ്രവര്‍ത്തിച്ചു. മുപ്പതാം വയസ്സില്‍ നവറോജി ഇംഗ്ളണ്ടിലേക്ക് പോയി. അവിടത്തെ ലിബറല്‍ പാര്‍ട്ടിയില്‍ അംഗമായി. ഇന്ത്യയുടെ സ്വാതന്ത്ര്യത്തിനു വേണ്ടിയുള്ള പ്രവര്‍ത്തനങ്ങളും എഴുത്തുമായിരുന്നു അദ്ദേഹത്തിന്‍റെ പ്രധാന പ്രവര്‍ത്തനം.
