അനുഗ്രഹത്തിന്‍റെ പുണ്യകവാടങ്ങള്‍ തുറന്ന് റംസാന്‍ പിറന്നു.മുസ്ലീങ്ങള്‍ക്ക് നോമ്പുകാലം.
സത്യവിശ്വാസികള്‍ക്ക് സല്‍ക്കര്‍മ്മങ്ങളുടെ വസന്തോത്സവം. മനുഷ്യ സമൂഹത്തിന്‍റെ അഞ്ചിലൊന്നു വരുന്ന മുസ്ളീംങ്ങളുടെ ജീവിത ചിട്ടകള്‍ ഇന്നു മുതല്‍ മാറുകയാണ് .
പൂര്‍വ്വ ചക്രവാളത്തില്‍ പ്രഭാതത്തിന്‍റെ വെള്ളിരേഖ പ്രത്യക്ഷപ്പെട്ടാല്‍ അന്നപാനാദികളില്ല. ശാരീരിക ബന്ധങ്ങളില്ല. തെറ്റായ വാക്കും പ്രവര്‍ത്തിയുമില്ല. തികഞ്ഞ ശ്രദ്ധയാണെല്ലാറ്റിലും, പൂര്‍ണ സൂക്ഷ്മതയാണെങ്ങും.
പാപമോചനത്തിന്‍റെ മാസമായ റംസാന്‍ പ്രവാചകസന്ദേശങ്ങള്‍ പാലിച്ച് കഠിന വ്രതം ചെയ്യാനുള്ള അവസരമാണ്.
ലോകത്തിന്‍റെ പല ഭാഗത്തും ഒക് റ്റോബര്‍ 4 ന് വ്രതം തുടങ്ങിക്കഴിഞ്ഞു; കേരളത്തില്‍ ഒക് റ്റോബര്‍ 5 ന് ആണ് നോമ്പ് തുടങ്ങുന്നത്
ഖുര്‍ആന്‍ അവതീര്‍ണ്ണമായ മാസം
വിശുദ്ധ ഖുര്‍ ആന്‍ അവതരിപ്പിക്കുക വഴി മനുഷ്യര്‍ക്ക് ആന്തരികവെളിച്ചം നല്‍കിയ അല്ലാഹുവിന് നന്ദി സൂചകമായാണ് വ്രതമനുഷ്ഠിക്കുന്നത്. റംസാന്‍ മാസത്തിലാണല്ലോ വിശുദ്ധ ഖുര്‍ആന്‍ അവതീര്‍ണ്ണമായത്.
ഖുറാന്‍ പാരായണം ചെയ്തും , ഉംറ നിര്‍വ്വഹിച്ചും, ദാനധര്‍മ്മങ്ങള്‍ നടത്തിയും വിശ്വാസസമൂഹം പാപപരിഹാരത്തിനായി പള്ളികളില്‍ ദിനരാത്രങ്ങള്‍ ചെലവഴിക്കും. മക്കയും മദീനയും നോമ്പുകാലത്ത് വിശ്വാസികളുടെ സംഗമഭൂമിയായി മാറും.
ഇന്ത്യ, ഈജിപ്ത്, ഇറാന്‍, സുഡാന്‍, ഇന്തോനേഷ്യ, പാകിസ്ഥാന്‍ എന്നീ രാജ്യങ്ങളില്‍ നിന്നുള്ളവര്‍ മക്ക, മദീന പള്ളികളില്‍ തമ്പടിച്ചിട്ടുണ്ട്.
