ഒളിമ്പിക് ഗുസ്തിയില്‍ ഇന്ത്യയുടെ സുശീല്‍ കുമാര്‍ വെങ്കലമെഡല്‍ നേടിയതോടെ റീ പെ ചേജ് എന്ന വാക്ക് എല്ലാവരുടെയും ശ്രദ്ധയില്‍ പെട്ടിരിക്കുകയാണ്.
ആദ്യ റൌണ്ടില്‍ ഉക്രൈനിലെ ആന്‍ഡ്രിയ സ്റ്റാഡ്നിക്കിനോട് തോറ്റ സുശീല്‍ കുമാര്‍ ഈ മത്സരത്തില്‍ നിന്നും പുറത്തായി എന്നായിരുന്നു. ആദ്യം വന്ന വാര്‍ത്തകള്‍. പിന്നീട് കേട്ടു ഇനി ആകെ ഒരു പ്രതീക്ഷ റീ പെ ചേജ് മാത്രമാണെന്ന്. പ്രതീക്ഷ ശരിയായി. റീ പെ ചേജ് ലൂടെ സുശീല്‍ ഇന്ത്യയ്ക്ക് വെങ്കല മെഡല്‍ സമ്മാനിച്ചു.
സൈക്ലിംഗ്, തുഴച്ചില്‍, ജൂഡോ, ഗുസ്തി, കരാട്ടെ, ടേക്ക് വാണ്ടോ തുടങ്ങിയ ഇനങ്ങളിലാണ് റീ പെ ചേജ് ഉപയോഗിച്ച് വിജയികളെ നിര്‍ണ്ണയിക്കുക പതിവ്. സൈക്ലിംഗിലും തുഴച്ചിലിലും ഓരോ ഹീറ്റ്സിലെയും റണ്ണര്‍ അപ്പ് മാരെ വച്ച് നടത്തുന്ന അവസാനത്തെ ഹീറ്റ്സാണ് റീ പെ ചേജ്.
ഇതിലെ വിജയിക്കും ഫൈനല്‍ മത്സരത്തില്‍ പങ്കെടുക്കാന്‍ കഴിയും. എന്നാല്‍ ഗുസ്തിയിലും മറ്റും റീ പെ ചേജ് വേറൊരു തരത്തിലാണ് നടത്തുക. ഒരു ഇനത്തില്‍ ഫൈനലിലെത്തിയ രണ്ട് ഗുസ്തിക്കാരോട് തോറ്റ നാലു പേര്‍ വീതം മത്സരിച്ച് അവയില്‍ വിജയികളാവുന്ന രണ്ട് പേര്‍ക്കാണ് മൂന്നാം സമ്മാനം പങ്കിട്ടു നല്‍കുക.
