സ്വീഡനിൽ സന്ദർശനം നടത്തുന്ന രാഷ്ട്രപതി പ്രണബ് മുഖര്‍ജിയുടെ വാഹനവ്യൂഹം അപകടത്തില്‍പ്പെട്ടു. പ്രണബ് സുരക്ഷിതനാണെന്നും ആര്‍ക്കും പരിക്കില്ലെന്നും ഡല്‍ഹിയിലെ രാഷ്ട്രപതിഭവന്‍ വൃത്തങ്ങള്‍ വ്യക്തമാക്കിയെങ്കിലും അപകടത്തിൽ എട്ടു പേർക്ക് പരുക്കേറ്റെന്നും ഇവരെ ആശുപത്രിയിൽ പ്രവേശിപ്പിച്ചിരിക്കുകയാണെന്നും സ്വീഡിഷ് മാധ്യമങ്ങൾ റിപ്പോർട്ട് ചെയ്തു. ആരുടെയും നില ഗുരുതരമല്ല.

തിങ്കളാഴ്ച്ച വൈകീട്ട് സ്വീഡനിലെ ഉപ്‌സാല സര്‍വകലാശാലയിലെ ചടങ്ങില്‍ സംബന്ധിക്കാന്‍ പോവുകയായിരുന്നു രാഷ്ട്രപതി. ഈ സമയത്താണ് അപകടം സംഭവിച്ചത്. നാലുകാറുകൾ ആയിരുന്നു രാഷ്ട്രപതിക്ക് അകമ്പടിയായി പോയിരുന്നത്. കൂടാതെ മറ്റ് വാഹനങ്ങളും ഉണ്ടായിരുന്നുവെങ്കിലും അപകടം സംഭവിക്കുകയായിരുന്നു. വാഹനവ്യൂഹത്തില്‍ പിറകിലെ വാഹനമാണ് അപകടത്തില്‍പ്പെട്ടത്. സ്വീഡനിലെ കിരീടാവകാശി വിക്ടോറിയ രാജകുമാരിയും ഭര്‍ത്താവ് ഡാനിയല്‍ രാജകുമാരനും രാഷ്ട്രപതിക്കൊപ്പമുണ്ടായിരുന്നു.