BIJU|
Last Modified വ്യാഴം, 15 നവം‌ബര്‍ 2018 (16:44 IST)
നടന്‍ അര്‍ജുന്‍ അടുത്തിടെ മീടൂ വിവാദത്തില്‍ പെടുകയും അത് കോളിവുഡില്‍ വലിയ കോളിളക്കമുണ്ടാക്കുകയും ചെയ്തിട്ട് അധികം ദിവസമായിട്ടില്ല. സംഗതി പൊലീസ് കേസായി. അര്‍ജുന്‍ അറസ്റ്റിലാകുമെന്നുവരെ റിപ്പോര്‍ട്ടുകള്‍ വന്നു.
ശ്രുതി ഹരിഹരന്‍ ഉന്നയിച്ച എല്ലാ ആരോപണങ്ങളും അര്‍ജുന്‍ നിഷേധിച്ചു. വിവാദത്തില്‍ അര്‍ജുനെ പിന്തുണച്ചും എതിര്‍ത്തും നിരവധി പേര്‍ രംഗത്തുവന്നു.
പുലിമുരുകനിലെ ‘ഡാഡി ഗിരിജ’യിലൂടെ മലയാളത്തിലും പ്രിയങ്കരനായി മാറിയ തെലുങ്ക് താരം ജഗപതി ബാബു അര്‍ജുനെ പിന്തുണച്ച് രംഗത്തെത്തിയതാണ് ഒടുവിലത്തെ വാര്‍ത്ത. “ഞാന്‍ അര്‍ജുനെ പിന്തുണയ്ക്കുന്നത് അദ്ദേഹം എന്‍റെ സുഹൃത്തായതുകൊണ്ടല്ല. എങ്ങനെയാണ് 150 പേര്‍ക്ക് നടുവില്‍ വച്ച് അര്‍ജുന്‍ ആ കുട്ടിയെ ഉപദ്രവിക്കുന്നത് എന്നതാണ് എന്‍റെ ചോദ്യം” - ജഗപതി ബാബു വ്യക്തമാക്കി.
യഥാര്‍ത്ഥത്തിലുള്ള മീടൂ മൂവ്‌മെന്‍റിനെ തകര്‍ക്കുകയാണ് ഇത്തരം ആരോപണങ്ങളിലൂടെ ചിലര്‍ നടത്തുന്നതെന്നും ജഗപതി ബാബു ആരോപിച്ചു. സ്വാര്‍ത്ഥരായ ചിലര്‍ ഈ മൂവ്‌മെന്‍റിനെ ഹൈജാക്ക് ചെയ്തിരിക്കുകയാണെന്ന് വിശാലും പ്രതികരിച്ചിരുന്നു.
എന്നാല്‍ അര്‍ജുനെ വിമര്‍ശിച്ച് പ്രകാശ് രാജ് അടക്കമുള്ള പ്രമുഖര്‍ രംഗത്തെത്തിയിരുന്നു.
