ബിജെപിയുടെ മുതിര്‍ന്ന നേതാവ് എല്‍.കെ.അദ്വാനിയെ ഡല്‍ഹി എയിംസ് ആശുപത്രിയില്‍ പ്രവേശിപ്പിച്ചു. പ്രായാധിക്യത്താലുള്ള അസ്വസ്ഥതകളെത്തുടര്‍ന്ന് ബുധനാഴ്ച രാത്രിയാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചത്. അദ്വാനിയെ യൂറോളജി വിഭാഗത്തിലെ ഡോക്ടര്‍മാരാണ് പരിശോധിക്കുന്നത്. മുതിര്‍ന്നവര്‍ക്കുള്ള ജറിയാട്രിക് വാര്‍ഡിലാണ് അദ്ദേഹത്തെ പ്രവേശിപ്പിച്ചിട്ടുള്ളത്. 96 കാരനായ അദ്ദേഹത്തിന്റെ ആരോഗ്യനില തൃപ്തികരമാണെന്നും നിരീക്ഷണത്തില്‍ തുടരുകയാണെന്നും ഡോക്ടര്‍മാര്‍ അറിയിച്ചു.

മൂന്നുമാസം മുന്‍പാണ് അദ്വാനിക്ക് രാജ്യത്തിന്റെ പരമോന്നത ബഹുമതിയായ ഭാരത രത്‌ന ലഭിച്ചത്. 2002 ജൂണ്‍ മുതല്‍ 2004 മെയ് വരെ വാജ്‌പേയി മന്ത്രി സഭയില്‍ അദ്ദേഹം ഉപ പ്രധാനമന്ത്രി സ്ഥാനം വഹിച്ചിരുന്നു. നിരവധി തവണ ബിജെപിയുടെ അധ്യക്ഷനും ആയിരുന്നു.