കൊച്ചി|
സജിത്ത്|
Last Updated:
ശനി, 7 മെയ് 2016 (17:45 IST)
സമൂഹത്തില്‍ പരസ്പരമുള്ള കൂട്ടായ്മ നഷ്‌ടപ്പെടുന്നതാണ് പെരുമ്പാവൂരിലെ ജിഷയുടേതുപോലുള്ള കൊലപാതകങ്ങള്‍ ഉണ്ടാകാന്‍ കാരണമെന്ന് ഹൈക്കോടതി ജസ്റ്റിസ് കെമാല്‍പാഷ. ഈ മനസ്ഥിതി മാറിയില്ലെങ്കില്‍ സമൂഹത്തില്‍ ഇനിയും ജിഷമാര്‍ ആവര്‍ത്തിക്കും. അതുപോലെതന്നെ അയല്‍ക്കാരന്റെ കണ്ണീര്‍ കണ്ടാല്‍ ഇടപെടേണ്ടത് ഒരു പൗരന്റെ കടമയാണെന്നും ജസ്റ്റിസ് കെമാല്‍ പാഷ കൂട്ടിച്ചേര്‍ത്തു.
ജിഷ മരിക്കുന്നതുവരെ അവരെ സംരക്ഷിക്കാന്‍ ഇവിടെ ആരുമുണ്ടായില്ല. മരിച്ചുകഴിഞ്ഞപ്പോള്‍ അവര്‍ക്ക് വലിയ പരിവേഷമായി. ഒരു പുഴുവിനെപ്പോലെ ഈ സമൂഹത്തില്‍ ഇങ്ങനെയൊരാള്‍ ജീവിച്ചിരുന്നു എന്ന് അംഗീകരിക്കപ്പെടാന്‍ അവസാ‍നം അവരുടെ മരണം ആവശ്യമായി വന്നു. ദുരന്തങ്ങള്‍ വരുമ്പോള്‍ അതിനെ വന്‍ ആഘോഷമാക്കുക. ഇതാണ് നമ്മുടെ സമൂഹത്തിന്റെ രീതി. ഈ സ്ഥിതിയാണ് ആദ്യം മാറേണ്ടത്.
ഇതുപോലെ ഇനിയും ധാരാളം ജിഷമാര്‍ നമ്മുടെ സമൂഹത്തില്‍ ജീവിക്കുന്നുണ്ട്. അവരെയെല്ലാം നമ്മള്‍ കാണണം. അയല്‍ക്കാരന്റെ കണ്ണീര്‍ കാണാന്‍ നമ്മള്‍ക്ക് കഴിയണം. അത് ഓരോ പൗരന്റെയും കടമയാണ്. കെമാല്‍ പാഷ വ്യക്തമാക്കി.
