മകളെ കൊന്ന കേസില്‍ കുറ്റപത്രം കിട്ടിയ ഇന്ദ്രാണി മുഖര്‍ജി വിവാഹമോചനത്തിന്. പ്രത്യേക സി ബി ഐ കോടതിയിലാണ് ഭര്‍ത്താവ് പീറ്റര്‍ മുഖര്‍ജിയില്‍ നിന്ന് ഇന്ദ്രാണി വിവാഹമോചനം ആവശ്യപ്പെട്ടത്. ഇന്ദ്രാണിക്കൊപ്പം തന്നെ കേസില്‍ കുറ്റവാളിയാണ് ഇപ്പോഴത്തെ ഭര്‍ത്താവായ പീറ്റര്‍ മുഖര്‍ജിയും.

ഇത് അവരുടെ വ്യക്തിപരമായ കാര്യമാണെന്നും അതിനാല്‍ കോടതിയുടെ അനുമതി ആവശ്യമില്ലെന്ന് അവരെ അറിയിച്ചതായും സ്പെഷ്യല്‍ ജഡ്‌ജ് എച്ച് എസ് മഹാജന്‍ പറഞ്ഞു. അതേസമയം, ഇന്ദ്രാണി വിവാഹമോചനം ആവശ്യപ്പെടുന്ന സമയത്ത് പീറ്റര്‍ മുഖര്‍ജി കോടതിയില്‍ ഉണ്ടായിരുന്നില്ല. ഇന്ദ്രാണി ഇക്കാര്യം കോടതിക്കു മുമ്പില്‍ അവതരിപ്പിക്കുന്നതിനു തൊട്ടു മുമ്പാണ് പീറ്ററിനെ കോടതിയില്‍ നിന്ന് ജയിലിലേക്ക് കൊണ്ടുപോയത്.

ഷീന ബോറ കൊലക്കേസില്‍ ഇന്ദ്രാണി മുഖര്‍ജിയും ഭര്‍ത്താവ് പീറ്റര്‍ മുഖര്‍ജിയും മുന്‍ ഭര്‍ത്താവ് സഞ്ജീവ് ഖന്നയും കുറ്റക്കാരാണെന്ന് വ്യക്തമാക്കി കുറ്റപത്രം സമര്‍പ്പിച്ചിരുന്നു. ഇതിനു പിന്നാലെയാണ് വിവാഹമോചനം ആവശ്യപ്പെട്ട് ഇന്ദ്രാണി രംഗത്തെത്തിയത്.