ബിജെപിയെ നിലനിര്‍ത്തുന്നത് മോഡി ഓക്സിജനാണെന്നും അത് തീരുന്നതോടെ ബിജെപിയുടെ കഥകഴിയുമെന്നും ശിവസേന. അധികാരത്തിന്റെ രൂപത്തിൽ ലഭിച്ച 'മോഡി ഓക്സിജൻ' ആണ് ബിജെപിയെ ഇപ്പോൾ നിലനിർത്തുന്നത്. ജനപ്രീതി തീരുന്നതോടെ ഇത് അവസാനിക്കുമെന്നും തങ്ങളുടെ മുഖപത്രമായ സാമ്നയിലെ മുഖപ്രസംഗത്തിലാണ് ബിജെപിക്കെതിരെ ശിവസേന ആഞ്ഞടിച്ചത്.

ശിവസേനയുടെ രാജ്യസ്നേഹത്തിലും പോരാട്ടങ്ങളിലും ഹിന്ദുത്വ പ്രശ്നങ്ങളിലും യാതൊരു മാറ്റവും വരുത്താൻ ഉദ്ദേശിക്കുന്നില്ല. ഞങ്ങളുടെ വിശ്വാസങ്ങൾ മാറ്റില്ല. രാജ്യത്തിന്റെ ശത്രുക്കൾക്കെതിരെ ശിവസേന യുദ്ധം തുടരും തങ്ങള്‍ നിലപാടുകളിൽ നിന്നും വ്യതിചലിച്ചിട്ടില്ലെന്നും അതുമായി മുന്നോട്ടു പോകുമെന്നും സേന വ്യക്തമാക്കി.

ബിജെപിയുമായുള്ള ശിവസേനയുടെ ബന്ധം മോശമാകുന്നതിന്റെ പുതിയ തെളിവുകളാണ് ഇപ്പോൾ പുറത്തുവരുന്നത്. പ്രാദേശിക തിരഞ്ഞെടുപ്പിൽ വേണ്ടിവന്നാൽ ഒറ്റയ്ക്ക് മൽസരിക്കാന്‍ തയാറാണ് എന്ന സേനയുടെ തുറന്നുപറച്ചിലാണ് ഇതെന്നും നിഗമനങ്ങളുണ്ട്.