ബാഗേജില്‍ വെടിയുണ്ട കണ്ടെത്തിയതിനെ തുടര്‍ന്ന് ബിജെപി അധ്യക്ഷന്‍ നിതിന് ഗഡ്കരിയുടെ പൈലറ്റിനെ സി‌ഐ‌എസ്‌എഫ് പിടികൂടി. ഗഡ്കരിക്ക് നാഗ്പൂരിലേക്ക് പോകുന്നതിന് തയ്യാറാക്കിയിരുന്ന ഒരു സ്വകാര്യ ചാര്‍ട്ടര്‍ കമ്പനിയുടെ വിമാനം പറത്തേണ്ടിയിരുന്ന വിദേശ പൈലറ്റാണ് പിടിയിലായത്.
എയ്‌റോ എയര്‍ ചാര്‍ട്ടര്‍ കമ്പനിയിലെ കാനഡക്കാരനായ പൈലറ്റ്, റാഫേല്‍ ജോസ് ഹബ്ബാര്‍ഡിനെയാണ് തിങ്കളാഴ്ച രാവിലെ ഒമ്പത് മണിയോടെ ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ഡൊമസ്റ്റിക് ടെര്‍മിനലില്‍ അറസ്റ്റ് ചെയ്തത്. ഇയാളുടെ ബാഗേജില്‍ ഒരു ലൈവ് കാട്രിഡ്ജ് കണ്ടതിനെ തുടര്‍ന്നാണ് അറസ്റ്റ് നടന്നത്.
പ്രാഥമിക ചോദ്യം ചെയ്യലുകള്‍ക്ക് ശേഷം കൂടുതല്‍ അന്വേഷണങ്ങള്‍ക്കായി പൈലറ്റിനെ ലോക്കല്‍ പൊലീസിനു കൈമാറി. സംഭവത്തില്‍ ദുരൂഹതയുണ്ടെന്ന് സംശയിക്കുന്നതായി ബിജെപി വൃത്തങ്ങള്‍ പറയുന്നു.
