സംഗീതമെന്നാല്‍ എനിക്കു ജീവിതമാണ്-പറയുന്നത് രണ്ടര പതിറ്റാണ്ടിലേറെയായി തന്‍റെ അതിശയിപ്പിക്കുന്ന സ്വരമാധുരിയിലൂടെ പരസഹസ്രം ഭാരതീയരുടെ മനസില്‍ കുളിര്‍മഴയായ പാട്ടുകാരന്‍-ഹരിഹരന്‍.
വിനയവും മാനുഷികതയും കൊണ്ട് ഓരോ കലാകാരനും മാതൃകയാക്കത്തക്ക വ്യക്തിത്വമാണ് ഹരിഹരന്‍.
ഹരിഹരന്‍ ജനപ്രിയനായൊരു കലാകാരനായി വളര്‍ന്നതിന് പിന്നില്‍ കഠിനമായ യത്നത്തിന്‍റെ കഥയുണ്ട്. 1977 മുതല്‍ തുടങ്ങിയ സംഗീതോപാസന ഇന്നും തുടരുന്നു. കഠിനമായ പരിശ്രമവും അര്‍പ്പണ ബോധവും ഹരിഹരന്‍റെ സ്വഭാവ വിശേഷതകളാണ്.
അതിലൂടെ അദ്ദേഹം നേടിയെടുത്തതോ തന്‍റേതായ ഒരു ശൈലി, ശബ്ദം ഇവയൊക്കെയാണ്. സംഗീത പ്രേമികള്‍ അത് തിരിച്ചറിയുകയും ചെയ്തു. സിനിമയില്‍ പാടുക എന്ന തന്‍റെ ആഗ്രഹം സഫലമാവുക വഴി അദ്ദേഹം ലക്ഷ്യം വച്ചത് ജനപ്രിയനാവുക എന്നതായിരുന്നു. ജനകീയമായ ഈ മാധ്യമം ഓരോ ഗായകന്‍റെയും ശബ്ദത്തെ ഏവര്‍ക്കും പരിചിതമാക്കുന്നു എന്ന് ഹരിഹരന്‍ പറയുന്നു.
തിരുനെല്‍വേലി സ്വദേശി കര്‍ണ്ണാടക സംഗീതജ്ഞ അലമേലുവിന്‍റെയും, തിരുവനന്തപുരത്ത് വേരുകളുള്ള എച്ച്.എ.എസ്.മണി ഭാഗവതരുടെയും മകന് ഹിന്ദുസ്ഥാനി സംഗീതത്തോട് പ്രണയമായിരുന്നു. തിരുവനന്തപുരത്തെ പുത്തന്‍തെരുവില്‍ മണി ഭാഗവതരുടെ പൂര്‍വികര്‍ താമസിച്ചിരുന്നു. സംഗീത കോളജില്‍ പഠിച്ച എച്ച്.എ.എസ്.മണി പിന്നീട് സംഗീത അധ്യാപകനായി. ശിഷ്യയായ അലമേലു അദ്ദേഹത്തിന്‍റെ ഭാര്യയായി.
