എസ് എം എസുകളിലൂടെയും ഇന്‍റര്‍നെറ്റിലൂടെയും വ്യാപകമായ ആരോപണങ്ങളും അപവാദങ്ങളും ആരൊക്കെ ഉയര്‍ത്തിയാലും ബോക്സോഫീസിലെ രാജാക്കന്‍‌മാരില്‍ ഒരാള്‍ താന്‍ തന്നെയാണെന്ന് ബിഗ്സ്റ്റാര്‍ പൃഥ്വിരാജ് വീണ്ടും തെളിയിച്ചു. പൃഥ്വിയുടെ പുതിയ റിലീസായ ‘ഇന്ത്യന് റുപ്പി’ മെഗാഹിറ്റിലേക്ക് കുതിക്കുകയാണ്. കേരളക്കരയാകെ ഒരേ സ്വരത്തില്‍ ‘ഉഗ്രന്‍ സിനിമ’ എന്നു വിലയിരുത്തിയ ഇന്ത്യന് റുപ്പി ആദ്യവാരം തന്നെ കോടികള്‍ കളക്ട് ചെയ്ത് നില ഭദ്രമാക്കി.
രണ്ടാഴ്ചയ്ക്കുള്ളില്‍ ഇന്ത്യന് റുപ്പി മുതല്‍ മുടക്ക് തിരിച്ചുപിടിക്കുമെന്നാണ് റിപ്പോര്‍ട്ടുകള്‍. രഞ്ജിത്തിന് അടുത്ത കാലത്ത് ലഭിക്കുന്ന ഏറ്റവും മികച്ച വിജയമായിരിക്കും ഈ സിനിമയുടേതെന്നാണ് ട്രേഡ് പണ്ഡിറ്റുകളുടെ അഭിപ്രായം. ഹിറ്റ് ചാര്‍ട്ടില്‍ ഒന്നാം സ്ഥാനത്താണ് ഇന്ത്യന് റുപ്പി.
പൃഥ്വിരാജ് ചിത്രം തകര്‍ത്തുവാരുമ്പോള്‍ തന്നെ മോഹന്ലാല് ചിത്രമായ സ്നേഹവീടും വിജയമായി മാറുകയാണ്. സത്യന്‍ അന്തിക്കാട് സംവിധാനം ചെയ്ത ‘സ്നേഹവീട്’ ഹിറ്റാകുമെന്ന് ഉറപ്പായിക്കഴിഞ്ഞു. മികച്ച ആദ്യ പകുതിയും ശരാശരി നിലവാരം പോലുമില്ലാത്ത രണ്ടാം പകുതിയുമാണ് സ്നേഹവീടിനുള്ളത്. എന്നാല്‍ മലയാളിത്തം തുളുമ്പുന്ന രംഗങ്ങള്‍ പ്രേക്ഷകരെ ആകര്‍ഷിച്ചതാണ് ചിത്രത്തിന്‍റെ വിജയത്തിന് കാരണം.
പുതുമുഖം രാഹുല്‍ പിള്ള, ഷീല, മോഹന്ലാല്, ഇന്നസെന്‍റ് എന്നിവരുടെ പ്രകടനമാണ് സ്നേഹവീടിന്‍റെ ഹൈലൈറ്റ്. എന്നാല്‍ മാമുക്കോയയുടെ കഥാപാത്രം കൈയടിക്ക് പകരം കൂവല്‍ ഏറ്റുവാങ്ങുന്നു.
