അച്ഛനെ ആക്രമിച്ച ഒരാളെ തല്ലിവീഴ്ത്തുമ്പോള്‍ സേതുമാധവന്‍ എന്ന പാവം യുവാവിനറിയില്ല, തന്‍റെ ജീവിതമാകെ കരിനിഴല്‍ വീഴ്ത്താന്‍ പോകുന്ന കീരിക്കാടന്‍ ജോസാണ് അതെന്ന്. അയാള്‍ തന്നെ തേടി വരുമെന്നും തന്‍റെ ജീവിതം അവിടെ വഴിത്തിരിവിലെത്തുകയാണെന്നും അയാള്‍ക്കറിയില്ല. വേണമെങ്കില്‍ സേതുവിന് അവിടെ നിന്ന് രക്ഷപ്പെടാമായിരുന്നു. പക്ഷേ ബന്ധങ്ങളുടെ കെട്ടുപാടുകളുണ്ട് അയാള്‍ക്ക്. ഒടുവില്‍ എല്ലാവരുടെ പ്രതീക്ഷകളും തകര്‍ത്ത് ആയുസ് മാത്രം നേടിക്കൊണ്ട് അയാള്‍ ഒരു കൊലയാളിയായിത്തീര്‍ന്നു. ലോഹിതദാസിന്‍റെ സേതുമാധവനായി മോഹന്‍ലാല്‍ നിറഞ്ഞാടി.
നായകന്‍ ഭയന്നോടുന്നതോന്നും ആലോചിക്കാന്‍ പോലും ധൈര്യമില്ലാതിരുന്ന സിനിമാലോകത്തിന് മുന്നിലാണ് സേതു എന്ന പച്ചമനുഷ്യന്‍ ശത്രുവില്‍ നിന്ന് ഓടിയൊളിക്കാന്‍ ശ്രമിച്ചത്. അയാള്‍ പറയുന്നുണ്ട് - “കീരിക്കാടനോ പരമേശ്വരനോ ഒന്ന് ആഞ്ഞടിച്ചാല്‍ ഞാനില്ല”. പക്ഷേ അയാള്‍ പ്രതികരിച്ചുപോകുന്നു. കാരണം അയാള്‍ക്ക് ജീവിക്കണം. ബന്ധുക്കള്‍ക്കും സുഹൃത്തുക്കള്‍ക്കുമൊപ്പം, കുട്ടിക്കാലം മുതല്‍ സ്നേഹിച്ച ദേവിക്കൊപ്പം. പക്ഷേ വിധിയുടെ ചതിക്കുഴി അയാള്‍ക്കായി തീര്‍ത്തത് മറ്റൊന്നായിരുന്നു. എല്ലാം അയാള്‍ക്ക് നഷ്ടപ്പെടുകയായിരുന്നു.
WEBDUNIA|
കിരീടവും സേതുമാധവനും മലയാളികള്‍ ഒരിക്കലും മറക്കില്ല. ആ പാവം സേതുവിനെ ഹൃദയത്തില്‍ സൂക്ഷിക്കുകയാണ് ഓരോരുത്തരും. ആ കഥാപാത്രത്തിന് ജീവന്‍ പകര്‍ന്ന മഹാനടനെയും.
