മദ്യലഹരിയില്‍ അക്രമം കാട്ടിയ റഷ്യക്കാരി പൊലീസ് പിടിയില്‍
തിരുവനന്തപുരം|
WEBDUNIA|
PRO
മദ്യ ലഹരിയില്‍ വിമാനത്തിനകത്തും പുറത്തും ബഹളം വയ്ക്കുകയും അക്രമം കാട്ടുകയും ചെയ്ത റഷ്യക്കാരിയായ ടൂറിസ്റ്റ് പൊലീസ് പിടിയിലായി. തിരുവനന്തപുരം രാജ്യാന്തര വിമാനത്താവളത്തില്‍ കഴിഞ്ഞ ദിവസം പുലര്‍ച്ചെയായിരുന്നു സംഭവം.
വെളുപ്പിനു നാലോടെ ദോഹയില്‍ നിന്നുള്ള ഖത്തര്‍ എയര്‍വേസില്‍ എത്തിയ മരിയന്‍ കോണ്‍ട്രാസ്ലോവിയ എന്ന 34 കാരിയെ ബലം പ്രയോഗിച്ചാണു പൊലീസ് അറസ്റ്റ് ചെയ്തത്. വിമാനത്തില്‍ നിന്ന് ലഭിച്ച മദ്യം കഴിച്ചു പൂസായ ഇവര്‍ വിമാനത്തിനുള്ളില്‍ വച്ചു തന്നെ വിമാന ജോലിക്കാരെ ആക്രമിച്ചിരുന്നു. വിമാനത്തിനു പുറത്തും ബഹളം തുടര്‍ന്നതോടെ ഇവരെ വിമാനത്താവള സുരക്ഷാ ചുമതലയുള്ള സി.ഐ.എസ്.എഫ് വനിതാ കോണ്‍സ്റ്റബിള്‍മാര്‍ അനുനയിപ്പിക്കാന്‍ ശ്രമിച്ചെങ്കിലും വിജയിച്ചില്ല.
കോണ്‍സ്റ്റബിള്‍മാരെ ഇവര്‍ അടിക്കുകയും കടിക്കുകയും ചെയ്തു. തുടര്‍ന്ന് വലിയതുറ പൊലീസ് എത്തി ബലപ്രയോഗത്തിലൂടെ ഇവരെ കീഴടക്കി അറസ്റ്റ് ചെയ്യുകയായിരുന്നു. വൈദ്യ പരിശോധനയ്ക്ക് വിധേയമാക്കിയ ശേഷം കോടതിയില്‍ ഹാജരാക്കി. പരിക്കേറ്റ വനിതാ കോണ്‍സ്റ്റബിള്‍മാരെ ജനറല്‍ ആശുപത്രിയില്‍ പ്രവേശിപ്പിച്ചു.
