പ്രധാനമന്ത്രി നരേന്ദ്രമോഡിയുടെ പ്രസംഗം പരിഭാഷപ്പെടുത്തിയതില്‍ പിഴവുസംഭവിച്ച ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രന് പിന്തുണയുമായി നടി റിമാ കല്ലിങ്കല്‍. ഭാഷ ആശയ വിനിമയത്തിനുള്ളതാണെന്നും സുരേന്ദ്രന് സംഭവിച്ച പിഴവ് ആഘോഷിക്കുന്നതിലൂടെ മലയാളികള്‍ അവരുടെ സ്വഭാവ വൈചിത്ര്യമാണ് പുറത്തുകാണിക്കുന്നതെന്നും ഫേസ്ബുക്ക് പോസ്റ്റിലൂടെ റിമ വിമര്‍ശിച്ചു.

ആശയവിനിമയത്തിനുള്ളതാണ് ഭാഷ. ഒരു വ്യക്തി എന്താണെന്ന് കാണിച്ചുതരുന്നത് അയാള്‍ ഭാഷ കൈകാര്യം ചെയ്യുന്നതിലെ കഴിവും കഴിവില്ലായ്മയുമല്ല. ശ്രീമതി ടീച്ചര്‍ക്കും കെ സുരേന്ദ്രനുമൊക്കെ സംഭവിച്ച കാര്യങ്ങള്‍ ആഘോഷിക്കുന്നതിലൂടെ മലയാളികളുടെ സ്വഭാവ വൈചിത്രമാണ് പുറത്തുവരുന്നത്. നമ്മുടെ ലക്‍ഷ്യബോധത്തെ ഇല്ലായ്മ ചെയ്യുക എന്നതിന് മാത്രമാണ് ഇത്തരം പരിഹാസവും ചെളിവാരിയെറിയലും ഉപകാരപ്പെടുക - റിമ ഫേസ്ബുക്ക് പോസ്റ്റില്‍ പറയുന്നു.

പ്രധാനമന്ത്രി നരേന്ദ്രമോദിയുടെ പ്രസംഗം പരിഭാഷപ്പെടുത്തിയപ്പോള്‍ കെ സുരേന്ദ്രന് പിഴവ് സംഭവിച്ചതിനെ തുടര്‍ന്ന് സുരേന്ദ്രനുപകരം സംസ്ഥാന അധ്യക്ഷന്‍ വി മുരളീധരനാണ് പരിഭാഷപ്പെടുത്തിയത്. പ്രസംഗത്തില്‍ സംഭവിച്ച പിഴവ് മറ്റ് നേതാക്കള്‍ ചൂണ്ടിക്കാണിച്ചപ്പോള്‍ സുരേന്ദ്രന്‍ പിന്‍‌മാറുകയായിരുന്നു.

പ്രസംഗം തനിക്ക് കൃത്യമായി കേള്‍ക്കാന്‍ കഴിയുന്നില്ലെന്ന് സുരേന്ദ്രന്‍ പ്രധാനമന്ത്രിയോട് പറഞ്ഞു. അപ്പോള്‍ മറ്റാരെങ്കിലും പരിഭാഷ ഏറ്റെടുക്കാന്‍ മോഡി തന്നെയാണ് നിര്‍ദ്ദേശം നല്‍കിയത്. തുടര്‍ന്ന് വി മുരളീധരന്‍ ആ ചുമതല ഏറ്റെടുക്കുകയായിരുന്നു. അത്രയും സമയം പ്രധാനമന്ത്രിയുടെ പ്രസംഗം മുടങ്ങി.

താന്‍ കേരളത്തിലേക്ക് വരാന്‍ വൈകിയതിന് മാപ്പ് ചോദിക്കുന്നു എന്നാണ് മോഡി ഹിന്ദിയില്‍ പറഞ്ഞത്. എന്നാല്‍ ആ ഭാഗം സുരേന്ദ്രന്‍റെ പരിഭാഷയില്‍ ഉണ്ടായിരുന്നില്ല. ‘കേരളത്തിലെത്താനായതില്‍ വലിയ സന്തോഷമുണ്ട്’ എന്നാണ് സുരേന്ദ്രന്‍ പരിഭാഷപ്പെടുത്തിയത്.

മാത്രമല്ല, ശബരിമല സന്ദര്‍ശനത്തോടെ സന്ദര്‍ശനം ആരംഭിക്കാന്‍ ആലോചിച്ചിരുന്നു എന്ന ഭാഗവും സുരേന്ദ്രന്‍ പരിഭാഷപ്പെടുത്തിയില്ല. കേരളത്തില്‍ വലിയ മാറ്റം നടക്കുമ്പോള്‍ ഇവിടെ വരാന്‍ കഴിഞ്ഞതില്‍ സന്തോഷമുണ്ടെന്നായിരുന്നു സുരേന്ദ്രന്‍ മൊഴിമാറ്റം നടത്തിയത്. ഈ പിഴവ് മറ്റ് നേതാക്കള്‍ ചൂണ്ടിക്കാട്ടിയപ്പോഴാണ് തനിക്ക് കേള്‍ക്കുന്നില്ല എന്ന് പ്രധാനമന്ത്രിയോടുപറഞ്ഞ് സുരേന്ദ്രന്‍ പിന്‍‌മാറിയത്.

ഈ സംഭവം സോഷ്യല്‍ മീഡിയയില്‍ വലിയ ആഘോഷമായി മാറി. കെ സുരേന്ദ്രനെ കളിയാക്കിക്കൊണ്ടുള്ള പോസ്റ്റുകളുടെ പ്രവാഹമായിരുന്നു. ഇതിനെതിരെയാണ് റിമ കല്ലിങ്കല്‍ ഇപ്പോള്‍ രംഗത്തെത്തിയിരിക്കുന്നത്.