ഡല്‍ഹിയില്‍ നടത്തിയ വാര്‍ത്താസമ്മേളനത്തില്‍ എസ്.എഫ്.ഐ. അഖിലേന്ത്യ സെക്രട്ടറി കെ.കെ. രാഗേഷാണ് ഇക്കാര്യം പറഞ്ഞത്. രാഗേഷ് ശക്തമായാണ് ദേശാഭിമാനിയെയും സി.പി.എമ്മിനെയും ന്യായീകരിച്ചത്.
വിദ്യാഭ്യാസ കയ്യേറ്റ മാഫിയയുടെ പിന്തുണയോടെയാണ് ചില മാധ്യമങ്ങളും യു.ഡി.എഫും ഇടതുപക്ഷ പ്രസ്താനങ്ങള്‍ക്കെതിരെ, വിശേഷിച്ച് സി.പി.എമ്മിനെതിരെ ദുഷ്പ്രചരണം അഴിച്ചു വിടുന്നത്. ലോട്ടറി മാഫിയയില്‍ നിന്നും മാതൃഭൂമിയും മനോരമയം കൈപ്പറ്റിയ തുക വെളിപ്പെടുത്തണം.
ദേശാഭിമാനി വാങ്ങിയതിനെക്കാള്‍ മൂന്നും നാലും ഇരട്ടി തുക ഈ പത്രങ്ങള്‍ വാങ്ങിയിട്ടുണ്ടെന്നും കെ.കെ.രാഗേഷ് പറഞ്ഞു. ലോട്ടറികളുടെ പരസ്യം എല്ലാ പത്രങ്ങളും കൊടുക്കാറുണ്ട്. അതിന്‍റെ തുക കൈപ്പറ്റുന്നത് ധാര്‍മ്മികതയുടെ പ്രശ്നമാണെങ്കില്‍ ദേശാഭിമാനിയെപ്പോലെ തന്നെ മാതൃഭൂമിയും മനോരമയും ഇതിന് ഉത്തരം പറയേണ്ടി വരും.
ലോട്ടറി മാഫിയക്കെതിരെ സി.പി.എം നേതൃത്വം നല്‍കുന്ന ഇടതുപക്ഷ സര്‍ക്കാരും ദേശാഭിമാനിയും ശക്തമായ നിലപാട് എക്കാലവും സ്വീകരിച്ചിട്ടുണ്ടെന്നും യാഥാര്‍ത്ഥ്യം കേരളത്തിലെ ജനങ്ങള്‍ തിരിച്ചറിയുന്നുണ്ടെന്നും രാഗേഷ് പറഞ്ഞു.
