കൊല്ലം|
AISWARYA|
Last Modified വ്യാഴം, 22 ജൂണ്‍ 2017 (12:16 IST)
കരുനാഗപ്പള്ളിയില്‍ ബൈക്കില്‍ യാത്ര ചെയ്യവെ ദമ്പതിമാര്‍ക്കു നേരെ ആക്രമണം. ചൊവ്വാഴ്ച രാത്രി പത്തരയോടെ കരുനാഗപ്പള്ളി മാര്‍ക്കറ്റ് റോഡില്‍ വച്ചാണ് ഇത്തരത്തില്‍ ഒരു സംഭവം അരങ്ങേറിയത്. ബന്ധുവീട്ടില്‍ പോയ ശേഷം മകളോടൊപ്പം ബൈക്കില്‍ വീട്ടിലേക്കു മടങ്ങുകയായിരുന്നു ദമ്പതികള്‍. കാലിത്തീറ്റ ഫാക്ടറിക്കു സമീപം മുതല്‍ അക്രമികള്‍ ഇവരെ കാറില്‍ പിന്തുടര്‍ന്നു. മാര്‍ക്കറ്റ് റോഡില്‍ ബൈക്കെത്തിയപ്പോള്‍ കാറിലുണ്ടായിരുന്നവര്‍ ദമ്പതിമാര്‍ക്കു നേരെ അസഭ്യം പറയാന്‍ തുടങ്ങി.
ഭാര്യയോടും മകളോടും കാറില്‍ കയറാന്‍ അവര്‍ ആവശ്യപ്പെട്ടു.
തുടര്‍ന്ന് ബൈക്കിന് കുറുകെ കാര്‍ നിര്‍ത്തിയ അവര്‍ കൈയിലുണ്ടായിരുന്ന ബിയര്‍ കുപ്പി കൊണ്ട് ഭാര്യയുടെ ശരീരത്തില്‍ അടിച്ചു. തുടര്‍ന്ന് ബിയര്‍ കുപ്പി പൊട്ടിച്ച് ഭാര്യയുടെ ദേഹത്തേക്കു ബിയര്‍ ഒഴിച്ചതായും പരാതിയില്‍ വിശദമാക്കുന്നു.
ദമ്പതികളെ ഭീഷണിപ്പെടുത്തിയ ശേഷം സംഘം സ്ഥലം വിടുകയായിരുന്നു. തുടര്‍ന്ന് ഇവര്‍ പൊലീസില്‍ പരാതി നല്‍കി. രാത്രി രണ്ടു മണിയോടെ കരുനാഗപ്പള്ളി കല്ലേലിഭാഗം ഭാരതി മന്ദിരത്തില്‍ ജയകുമാര്‍ , കല്ലേലിഭാഗം കോളശേരില്‍ വീട്ടില്‍ ഷാജഹാന്‍
എന്നിവരെ പൊലീസ് അറസ്റ്റ് ചെയ്തു. അതില്‍ കാര്‍ ഉടമയായ മഹേഷ് നായരും കരുനാഗപ്പള്ളി സ്വദേശി വിഷ്ണുവും ഒളിവില്‍പ്പോയി.
