ബിജെപിയുടെ മുതിര്‍ന്ന നേതാവ് ഓ രാജഗോപാല്‍ നിയമസഭ തെരഞ്ഞെടുപ്പില്‍ നേമത്ത് ജയിക്കുമെന്ന് നടന്‍ ഭീമന്‍ രഘു. ലോക്‍സഭ തെരഞ്ഞെടുപ്പില്‍ അദ്ദേഹത്തിന്റെ ജയം പ്രതീക്ഷിച്ചിരുന്നുവെങ്കിലും നിരാശയായിരുന്നു ഫലം. ജയിക്കുമെന്ന് കരുതി പൊട്ടിക്കാന്‍ വാങ്ങിവച്ച പടക്കങ്ങള്‍ ഇപ്പോഴും വീട്ടില്‍ ഉണ്ട്. എന്നാല്‍, വരുന്ന നിയമസഭ തെരഞ്ഞെടുപ്പിന്റെ ഫലം വരുമ്പോള്‍ ആ പടക്കങ്ങള്‍ പൊട്ടിക്കുമെന്നും താരം പറഞ്ഞു.

ലോക്‍സഭ തെരഞ്ഞെടുപ്പില്‍ പൊട്ടിക്കാനായി കരുതിവെച്ചിരുന്ന പടക്കം ഇത്തവണ പൊട്ടിക്കും. രാജേട്ടന്റെ വീടിന്റെ മുന്നിലെത്തിയായിരിക്കും പടക്കം പൊട്ടിക്കുക. കഴിഞ്ഞ തവണ നിസാരമായ വോട്ടിനാണ് അദ്ദേഹം പരാജയപ്പെട്ടത്. എന്നാല്‍ ഈ പ്രാവശ്യം അങ്ങനെയായിരിക്കില്ലെന്നും ഭീമന്‍ രഘു
പറഞ്ഞു. നേമത്ത് ബിജെപിയുടെ കേന്ദ്ര തെരഞ്ഞെടുപ്പ് കമ്മിറ്റി ഓഫീസ് ഉദ്ഘാടന ചടങ്ങി സംസാരിക്കുകയായിരുന്നു അദ്ദേഹം.

അതേസമയം, ബിജെപി സ്ഥാനാര്‍ഥി പട്ടിക ഔദ്യോഗികമായി പ്രഖ്യാപിച്ചിട്ടില്ലെങ്കിലും നേമത്ത് രാജഗോപാല്‍ സജീവമായി. മണ്ഡലത്തില്‍ പ്രചാരണത്തിന് ഇറങ്ങാന്‍ അദ്ദേഹത്തിന് നേതൃത്വം നിര്‍ദേശം നല്‍കിയിട്ടുണ്ട്. ഇനിയൊരു രാഷ്‌ട്രീയ അങ്കത്തിന് ഇല്ലെന്ന് വ്യക്തമാക്കിയാണ് രാജഗോപാല്‍ ജനവിധി തേടുന്നത്.