പ്രമുഖ കോണ്‍ഗ്രസ് നേതാവും മുന്‍ എം എല്‍ എയുമായ എന്‍ പി മൊയ്‌തീന്‍ അന്തരിച്ചു. 75 വയസ്സ് ആയിരുന്നു. കഴിഞ്ഞ കുറച്ചു കാലമായി രോഗ ബാധിതനായിരുന്നു എന്‍ പി മൊയ്‌തീന്‍. അഞ്ചാം കേരള നിയമസഭയിലും ആറാം നിയമസഭയിലും ബേപ്പൂര്‍ മണ്ഡലത്തെ പ്രതിനിധീകരിച്ചിട്ടുണ്ട്.

പ്രമുഖ സ്വാതന്ത്ര്യസമര സേനാനി എന്‍ പി അബുവിന്റെ മകനും പ്രശസ്ത സാഹിത്യകാരന്‍ എന്‍ പി മുഹമ്മദിന്റെ സഹോദരനുമാണ്. കെ എസ് യുവിലൂടെ വിദ്യാര്‍ത്ഥി രാഷ്‌ട്രീയത്തില്‍ സജീവമായ മൊയ്‌തീന്‍ സംസ്ഥാന വൈസ് പ്രസിഡന്റ് പദവി വരെ എത്തിയിരുന്നു. കെ പി സി സി ജനറല്‍ സെക്രട്ടറിയുമായിരുന്നു.

പിന്നീട് യൂത്ത് കോണ്‍ഗ്രസ് ജില്ല ജനറല്‍ സെക്രട്ടറിയും ട്രഷററുമായി. കോഴിക്കോട് ജില്ല കോണ്‍ഗ്രസ് കമ്മിറ്റി ജനറല്‍ പ്രസിഡന്റും സെക്രട്ടറിയും ആയി പ്രവര്‍ത്തിച്ചു. രണ്ടു തവണ നിയമസഭയില്‍ എത്തിയ മൊയ്‌തീന്‍ ആദ്യം കോണ്‍ഗ്രസ് സ്ഥാനാര്‍ഥിയായും രണ്ടാമത് കോണ്‍ഗ്രസ് - യു ടിക്കറ്റില്‍ ഇടതു പിന്തുണയിലുമാണ് ജയിച്ചത്.

വീക്ഷണം ഡയറക്ടറായും പ്രവര്‍ത്തിച്ചിട്ടുണ്ട്. ഖദീജയാണ് ഭാര്യ. നാല് മക്കളുണ്ട്.