കൊച്ചി|
jibin|
Last Modified ചൊവ്വ, 5 സെപ്‌റ്റംബര്‍ 2017 (14:16 IST)
കൊച്ചിയില്‍ യുവനടിയെ തട്ടിക്കൊണ്ടു പോയി ഉപദ്രവിച്ച കേസില്‍ അറസ്‌റ്റിലായി റിമാന്‍‌ഡില്‍ കഴിയുന്ന നടന്‍ ദിലീപിനെ കാണാന്‍ പോകുന്ന താരങ്ങള്‍ക്കെതിരെ വിമര്‍ശനവുമായി സംവിധായകന്‍ വിനയന്‍ രംഗത്ത്.
സ്വന്തം സഹപ്രവര്‍ത്തകയെ അപമാനിച്ച താരത്തിന് പിന്തുണയുമായിട്ടാണ് സിനിമാക്കാര്‍ കൂട്ടത്തോടെ ജയിലിലേക്ക് പോകുന്നത്. തന്റെ മകനാണ് ഇതേ അവസ്ഥയിലെങ്കില്‍ പൊലീസും കോടതിയും പറഞ്ഞിട്ടെ കാണാനുളള ധൈര്യം ഞാന്‍ കാണിക്കുകയുള്ളൂവെന്നും വിനയന്‍ പറഞ്ഞു.
അച്ഛന്റെ ശ്രാദ്ധത്തിനു പങ്കെടുക്കാന്‍ കോടതി അനുമതി നല്‍കിയതിന് പിന്നാലെയാണ് നിരവധി താരങ്ങള്‍ ദിലീപിനെ കാണാന്‍ ആലുവ സബ് ജയിലിലേക്ക് എത്തിയത്. ശനിയാഴ്ച കാവ്യാ മാധവനും മീനാക്ഷിയും സംവിധായകന്‍ നാദിര്‍ഷായ്ക്കൊപ്പം ജയിലില്‍ എത്തിയിരുന്നു.
ജയറാം, ഹരിശ്രീ അശോകന്‍, കലാഭവന്‍ ഷാജോണ്‍, സുരേഷ് കൃഷ്ണ, സംവിധായകന്‍ രഞ്ജിത്ത്, തിരക്കഥാകൃത്ത് ബെന്നി പി നായരമ്പലം, നടന്‍ സുധീര്‍, ജോര്‍ജേട്ടന്‍സ് പൂരം സിനിമയുടെ നിര്‍മാതാക്കളായ അരുണ്‍ ഘോഷ്, ബിജോയ് ചന്ദ്രന്‍ എന്നിവരും ജയിലിലെത്തി ദിലീപിനെ കണ്ടു.
