യുവ നടിയെ തട്ടിക്കൊണ്ടുപോയ കേസിലെ മുഖ്യപ്രതിയും നടിയുടെ മുൻ ഡ്രൈവറുമായ സുനിലിന് ആഡംബര വാഹനങ്ങളോട് എന്നും പ്രിയമായിരുന്നു. ഇടക്കിടയ്ക്ക് ഇയാള്‍ പല ആഡംബര വാഹനങ്ങളില്‍ നാട്ടിലുമെത്താറുണ്ടായിരുന്നു. നാട്ടിലെത്തി സുഹൃത്തുക്കളോടും അയൽവാസികളോടുമെല്ലാം കമ്പനി കൂടിയ ശേഷം തിരികെ പോയാൽ പിന്നെ മാസങ്ങൾക്കു ശേഷമാകും ഇയാള്‍ തിരിച്ചുവരുക.

സുനിയ്ക്ക് ബൈക്കുകളിൽ ഇഷ്ടവാഹനം പൾസറാണ്. അതുകൊണ്ടാണ് ഇയാള്‍ക്ക് ‘പൾസർ സുനി’യെന്ന ഇരട്ടപ്പേരു വീണതെന്ന് നാട്ടുകാര്‍ പറയുന്നു. മോഷ്ടിച്ചതോ അല്ലാത്തതോ ആയ പല ബൈക്കുകളിലും ഇയാൾ നാട്ടിൽ കറങ്ങാറുണ്ടെന്നും നാട്ടുകാര്‍ പറഞ്ഞു. പഠനകാലം മുതൽ തന്നെ പല കേസുകളിലും അക്രമസംഭവങ്ങളിലും ഇയാള്‍ ഉൾപ്പെട്ടിരുന്നതായും പല തവണ ജയിലിൽ കഴിഞ്ഞിട്ടുണ്ടെന്നും നാട്ടുകാർ ഓർക്കുന്നു.