കൊച്ചി|
jibin|
Last Updated:
ബുധന്‍, 9 ഓഗസ്റ്റ് 2017 (19:26 IST)
കൊച്ചിയില്‍ യുവനടിയെ തട്ടിക്കൊണ്ടു പോയ കേസില്‍ രണ്ട് പേര്‍ ഉടന്‍ അറസ്‌റ്റിലാകുമെന്ന് റിപ്പോര്‍ട്ട്. റിമാന്‍‌ഡിലുള്ള നടന്‍ ദിലീപുമായി അടുത്ത ബന്ധമുള്ള ഒരു സ്ത്രീയും പുരുഷനുമാണ് അറസ്‌റ്റിലാകുക എന്നാണ് പുറത്തുവരുന്ന വാര്‍ത്ത. സിനിമാ മേഖലയില്‍ സജീവമായിട്ടുള്ള ഒരു വ്യക്തിയാണ് ആദ്യം അറസ്‌റ്റിലാകുക എന്നാണ് സൂചന.
കേസിലെ ഒന്നാം പ്രതിയും നടിയെ ഉപദ്രവിക്കുകയും ചെയ്‌ത പള്‍സര്‍ സുനിയുടെ വെളിപ്പെടുത്തല്‍ പ്രകാരം ഗൂഢാലോചനയെക്കുറിച്ച് വ്യക്തമായി അറിവുള്ളയാളും ദിലീപുമായി അടുത്ത ബന്ധമുള്ളയാളുമാണ് അടുത്തതായി അറസ്‌റ്റിലാകുക. അതേസമയം, ദിലീപിന്റെ സഹായിയും മാനേജരുമായ അപ്പുണ്ണി, നാദിര്‍ഷാ എന്നിവര്‍ അന്വേഷണ സംഘത്തിന്റെ
നിഴലിലാണ്.
കേസില്‍ മാഡം ഉണ്ടെന്ന് പള്‍സര്‍ സുനി പറഞ്ഞതോടെയാണ് ദിലീപിന്റെ ഭാര്യം കാവ്യ മാധവനിലേക്കും സംശയങ്ങള്‍ നീളുന്നത്. എന്നാല്‍, ഗൂഢാലോചനയെക്കുറിച്ച് വ്യക്തമായി അറിവുള്ളയാളും ദിലീപുമായി അടുത്ത ബന്ധമുള്ള രണ്ടു പേരെയുമാണ് പൊലീസ് ലക്ഷ്യം വയ്‌ക്കുന്നത്. ദിലീപിന് ജാമ്യം ലഭിക്കുന്നതിന് മുമ്പായി കുറ്റപത്രം കോടതിയില്‍ സമര്‍പ്പിക്കാനാണ് പൊലീസ് നീക്കം. കേസില്‍ വ്യക്തമായ പങ്കുള്ള രണ്ടു പേരെ അറസ്‌റ്റ് ചെയ്യുന്നതുവഴി ദിലീപിനെതിരേയുള്ള തെളിവുകള്‍ ശക്തമാക്കാന്‍ സാധിക്കുമെന്നും അന്വേഷണ സംഘം വിലയിരുത്തുന്നു.
അതേസമയം, ദിലീപിനെതിരെ ശക്തമായ തെളിവുകള്‍ ഉണ്ടെന്ന് ആലുവ റൂറൽ എസ്പി എവി ജോർജ് കഴിഞ്ഞ ദിവസം വ്യക്തമാക്കിയത്. കേസിൽ മാപ്പു സാക്ഷി വേണമോയെന്ന് അന്വേഷണത്തിന്‍റെ അവസാന ഘട്ടത്തിൽ മാത്രമാകും തീരുമാനിക്കുക. റിമാന്‍‌ഡില്‍ കഴിയുന്ന ദിലീപിനെതിരേ ശക്തമായ തെളിവുകള്‍ അന്വേഷണ സംഘം ശേഖരിച്ചു കഴിഞ്ഞുവെന്നും റൂറൽ എസ്പി പറഞ്ഞു.
