നടിയെ ആക്രമിച്ച കേസിന്റെ പശ്ചാത്തലത്തിൽ നടൻ ദിലീപിനെ താരസംഘടനയായ അമ്മയിൽ നിന്നും പുറത്താക്കിയത് പൃഥ്വിരാജിന്റെ ആവശ്യപ്രകാരം ആണെന്നും അങ്ങനെ ചെയ്യാൻ മമ്മൂട്ടി കൂട്ടുനിന്നുവെന്നുമുള്ള നടൻ ഗണേഷ് കുമാറിന്റെ പ്രസ്താവനയ്ക്ക് മറുപടിയുമായി ലിബർട്ടി ബഷീർ.

കേസിൽ ദിലീപിനനുകൂലമായി മമ്മൂട്ടി നിൽക്കാത്തതാണ് ഗണേഷിനെ ചൊടിപ്പിച്ചതെന്ന് ലിബർട്ടി ബഷീർ ഏഷ്യാനെറ്റ് ന്യൂസ് അവറിൽ വ്യക്തമാക്കി. കേസിന്റെ തുടക്കത്തിൽ ദിലീപിനനുകൂലമായി മമ്മൂട്ടി സർക്കാരിനു മേൽ സമ്മർദ്ദം ചെലുത്തുകയും റെക്കമൻഡ് ചെയ്യുകയും ചെയ്തു. എന്നാൽ, സത്യങ്ങൾ മനസ്സിലാക്കിയ മമ്മൂട്ടി പിന്നീട് ഇതിൽ നിന്നും പിന്തിരിഞ്ഞെന്നും ഇതിന്റെ ചൊരുക്കാണ് ഗണേഷ് കുമാർ കഴിഞ്ഞ ദിവസം പറഞ്ഞതെന്നും ലിബർട്ടി ബഷീർ പറയുന്നു.

മമ്മൂട്ടി മനസ്സ് വെച്ചിരുന്നെങ്കിൽ ദിലീപ് ഇത്രയും കാലം ജയിലിൽ കിടക്കില്ലായിരുന്നു. മുഖ്യമന്ത്രിയുമായി മമ്മൂട്ടിക്ക് അടുത്ത ബന്ധമാണുള്ളത്. എന്നിട്ടും ദിലീപിനു വേണ്ടി താരം ഒന്നും ചെയ്യാതിരുന്നത് യാഥാർത്ഥ്യങ്ങൾ മനസ്സിലായത് കൊണ്ടാണെന്നും ലിബർട്ടി ബഷീർ പറഞ്ഞു.