കേരളത്തിലെ വാര്‍ത്താ ഫോട്ടോഗ്രാഫിയുടെ കുലപതികളില്‍ പ്രമുഖനായ ടി നാരായണന് (72) അന്തരിച്ചു. മലയാള മനോരയിലെ ചീഫ് ഫോട്ടോ ഗ്രാഫറായിരുന്നു.കുറച്ചുകാലം അദ്ദേഹം സുഖമില്ലതെ കിടപ്പിലായിരുന്നു.
മലയാള പത്രപ്രവര്‍ത്തനത്തില്‍ ന്യൂസ് ഫോട്ടോഗ്രാഫിക്ക് മേല്‍വിലാസം ഉണ്ടാക്കി കൊടുത്തവരില്‍ പ്രധാനിയാണ് നാരായണന്. കോഴിക്കോട്ടെ നാഷണല്‍ സ്റ്റുഡിയോവില്‍ നിന്ന് 1964 ല്‍ മനോരമയില്‍ എത്തുമ്പോള്‍ നാരായണന് വെറുമൊരു സ്റ്റുഡിയോ ഫോട്ടോഗ്രാഫറായിരുന്നു, നാരായണന്‍റെ സിദ്ധികളെ പുറം ലോകത്തിനു കാണിച്ച് കൊടുത്തത് മനോരമയായിരുന്നു.
വയനാട്ടിലെ നക്സല്‍ പ്രവര്‍ത്തനങ്ങള്‍ അമര്‍ച്ച ചെയ്യാന്‍ പൊലീസ് നടത്തിയ തിരച്ചില്‍ ആണ് നാരായണന്‍റെ ഫോട്ടാ‍കളെ വായനക്കാര്‍ക്ക് ഏറെ പരിചിതമാക്കിയത്. പൊലീസ് സംഘത്തിന്‍റെ പിന്നാലെ വയനാടന്‍ കാടുകളില്‍ അന്ന്‌ ടി.നാരായണനും ചൊവ്വല്ലൂര്‍ കൃഷ്ണന്‍ കുട്ടിയും പോയിരുന്നു.
വര്‍ഗീസിന്‍റെ വധം, അജിതയുടെ അറസ്റ്റ്, വയനാടന്‍ കാടുകളിലെ പൊലീസ് തിരച്ചില്‍ തുടങ്ങി ഒട്ടേറെ വാര്‍ത്താ ചിത്രങ്ങള്‍ ടി.നാരായണന് അനശ്വരമാക്കി.
തോണി മറിഞ്ഞ് കണ്ണവം സ്‌കൂളിലെ കുട്ടികള്‍ മരിച്ചപ്പോള്‍ ഒരമ്മയുടെ ദു:ഖം ക്യാമറയില്‍ പകര്‍ത്തിയ നാരായണന് അക്കാലത്തെ ഏറ്റവും വലിയ വാര്‍ത്താ ചിത്ര അവാര്‍ഡായ കിള്ളി അവാര്‍ഡ് ലഭിച്ചു. പിന്നീട് ഒട്ടേറെ പുരസ്കാരങ്ങളും അംഗീകാരങ്ങളും നാരായണനെ തേടിയെത്തി.
വീഡിയോ ക്യാമറകള്‍ ഇല്ലാതിരുന്ന അക്കാലത്ത് നാരായണന്‍റെ ഫോട്ടോവില്‍ പെടാനായി രാഷ്ട്രീയ നേതാക്കള്‍ മത്സരിച്ചിരുന്നു എന്നത് പരസ്യമായ രഹസ്യമാണ്. വാര്‍ത്താ ചിത്രത്തിന് മികവും ജീവസ്സും അര്‍ത്ഥ തലങ്ങളും നല്‍കാന്‍ നാരായണന്‍റെ ക്യാമറയ്ക്ക് ആയിരുന്നു.
