കൊച്ചി|
rahul balan|
Last Modified വെള്ളി, 25 മാര്‍ച്ച് 2016 (19:11 IST)
അന്തരിച്ച യുവനടൻ ജിഷ്ണു രാഘവന്റെ(35) സംസ്കാര ചടങ്ങുകൾ കൊച്ചി രവിപുരം ശ്മശാനത്തിൽ നടന്നു. ചലച്ചിത്ര മേഖലയിലെ പ്രമുഖരടക്കം നിരവധിപേര്‍ സംസ്കാര ചടങ്ങില്‍ പങ്കെടുത്തു. അർബുദ ബാധയെത്തുടർന്ന് ചികിൽസയിലായിരുന്ന ജിഷ്ണു ഇന്നു രാവിലെ കൊച്ചിയിലെ സ്വകാര്യ ആശുപത്രിയിലാണ് മരണത്തിന് കീഴടങ്ങിയത്.
പ്രമുഖ നടനും സംവിധായകനുമായ രാഘവന്റെ മകനാണ്. രാഘവന്‍ സംവിധാനം ചെയ്ത കിളിപ്പാട്ട് എന്ന ചിത്രത്തില്‍ ബാലതാരമായാണ് മലയാള സിനിമയില്‍ ജിഷ്ണു അരങ്ങേറ്റം കുറിച്ചത്. കമലിന്‍റെ നമ്മള്‍ എന്ന ചിത്രത്തിലൂടെ മലയാളത്തില്‍ ശ്രദ്ധ നേടി. റബേക്ക ഉതുപ്പ് കിഴക്കേമലയാണ് മലയാളത്തിൽ അവസാനം അഭിനയിച്ച ചിത്രം. ഇരുപത്തഞ്ചോളം സിനിമകളില്‍ അഭിനയിച്ചു.
കിളിപ്പാട്ടിനു പുറമെ വേണുഗോപന്‍റെ ചൂണ്ട, തമ്പി കണ്ണന്താനത്തിന്‍റെ ഫ്രീഡം, സുന്ദര്‍ദാസിന്‍റെ പൗരന്‍, ലോഹിതദാസിന്‍റെ ചക്കരമുത്ത്, അനില്‍ ബാബുവിന്‍റെ പറയാം തുടങ്ങിയ സിനിമകളില്‍ അഭിനയിച്ചു. സി ബി ഐ പരമ്പരയിലെത്തിയ നേരറിയാൻ സി ബി ഐയില്‍ മമ്മൂട്ടിക്കൊപ്പം ശ്രദ്ധേയവേഷത്തില്‍ അഭിനയിച്ചു.
