കോതമംഗലത്ത് പീഡിപ്പിക്കപ്പെട്ട സ്കൂള്‍ വിദ്യാര്‍ത്ഥിനിയുടെ സഹപാഠിയായ പെണ്‍കുട്ടിയും പീഡനത്തിനിരയായതായി മൊഴി. നിലവില്‍ പൊലീസ് അന്വേഷിക്കുന്ന കേസിലെ പീഡിപ്പിക്കപ്പെട്ട പെണ്കുട്ടി നല്‍കിയ മൊഴിയില്‍ നിന്നാണ് ഇക്കാര്യം വ്യക്തമായത്. തന്റെ സ്‌കൂളില്‍ പഠിക്കുന്ന മറ്റൊരു പെണ്‍കുട്ടിയെയും ചിലര്‍ ചേര്‍ന്ന് പീഡിപ്പിച്ചിട്ടുണ്ട് എന്നാണ് ഈ പെണ്‍കുട്ടിയുടെ വെളിപ്പെടുത്തല്‍. എന്നാല്‍ ഈ സംഭവം ഉള്‍പ്പെടുത്താതെയാണ് ഇപ്പോള്‍ അന്വേഷണം പുരോഗമിക്കുന്നത്.
പ്രായപൂര്‍ത്തിയാവാത്ത മകളെ പിതാവ് തന്നെ പലര്‍ക്കും കാഴ്ചവച്ച് ഗര്‍ഭിണിയാക്കിയ സംഭവത്തിലാണ് ഇപ്പോള്‍ അന്വേഷണം നടന്നുവരുന്നത്. ഇതിലെ കേസ് ഡയറി പരിശോധിക്കുന്നതിനിടെ പ്രിന്‍സിപ്പല്‍ ജില്ലാ കോടതിയാണ് ഞെട്ടിക്കുന്ന മറ്റൊരു പീഡനക്കഥ കണ്ടെത്തിയിരിക്കുന്നത്. ഈ സംഭവത്തിലെ പ്രതികളും അതേ സ്‌കൂളില്‍ പഠിക്കുന്നവര്‍ തന്നെയാണെന്നാണ് സൂചന.
അതേസമയം മകളെ രക്ഷിക്കേണ്ട അച്ഛന്‍ തന്നെ അവളെ അവിവാഹിതയായ അമ്മയാക്കാന്‍ കൂട്ടുനിന്ന സംഭവത്തെ കോടതി നടുക്കത്തോടെയാണ് നോക്കിക്കണ്ടത്. പെണ്‍കുട്ടിയെ സ്‌കൂളിലെ ആളൊഴിഞ്ഞ ഒരിടത്ത് വെച്ച് പീഡിപ്പിച്ചതായും കേസ് ഡയറിയില്‍ ഉണ്ട്. കാറില്‍ വച്ച് മൂന്ന് പേര്‍ ചേര്‍ന്ന് പെണ്‍കുട്ടിയെ ഉപയോഗിക്കുകയുണ്ടായി.
ഈ കേസില്‍ പെണ്‍കുട്ടിയുടെ പിതാവടക്കം 13 പ്രതികളെയാണ് ഇതുവരെ പോലീസ് പിടികൂടിയത്. ഇതില്‍ നെല്ലിക്കുഴി നജീബ്, ബര്‍ഹാന്‍ എന്ന തക്കുടു, ഷാഹുല്‍ ഹമീദ് എന്നിവരുടെ ജാമ്യാപേക്ഷ കോടതി ചൊവ്വാഴ്ച തള്ളി.
