പാകിസ്ഥാനിലെ സ്വാത് മേഖലയില്‍ ഞായറാഴ്ച നടന്ന ശക്തമായ പോരാട്ടത്തില്‍ പത്ത് തീവ്രവാദികളെ പാകിസ്ഥാന്‍ സൈന്യം കൊന്നു. വടക്കു പടിഞ്ഞാറന്‍ പാകിസ്ഥാനിലെ സ്വാത് മേഖലയില്‍ മൌലാന ഫസ്‌ലുള്ള എന്ന പുരോഹിതനും സംഘത്തിനും എതിരെയുള്ള സൈനിക നടപടിക്കിടെയാണ് തീവ്രവാദികള്‍ കൊല്ലപ്പെട്ടത്.
എഫ് എം മൌലാന എന്ന അപരനാമത്തില്‍ അറിയപ്പെടുന്ന ഈ പുരോഹിതന്‍ പാക് സര്‍ക്കാരിനു നേരെ വിശുദ്ധ യുദ്ധം പ്രഖ്യാപിച്ചിരിക്കുകയാണ്. താലിബാന്‍ അനുകൂല പ്രവര്‍ത്തനം നടത്തുന്ന ഇയാള്‍ക്കും സംഘത്തിനുമെതിരെ ശക്തമായ സൈനിക നടപടിക്കാണ് പാക് സര്‍ക്കാര്‍ ഉത്തരവിട്ടിരിക്കുന്നത്.
പാക് സൈന്യം മൌലാനയുടെ മദ്രസ ആക്രമിച്ചതിനു പ്രതികാരമായി തീവ്രവാദികള്‍ പാക് സൈനികരെ തട്ടിക്കൊണ്ടു പോയി പൊതുജനങ്ങളുടെ മുമ്പില്‍ വച്ച് തലവെട്ടി കൊന്നിരുന്നു. സ്വാതില്‍ ഇപ്പോഴും പോരാട്ടം തുടരുകയാണ്.
