പെഷവാറിലെ മിലിട്ടറി സ്കൂളില്‍ ഭീകരാക്രമണം നടത്തിയ കേസില്‍ പാക് സൈനിക കോടതി വധശിക്ഷ വിധിച്ചു. ആറുപേര്‍ക്ക് വധശിക്ഷ വിധിച്ച കോടതി ഒരാളെ ജീവപര്യന്തത്തിനും വിധിച്ചു. ആകെ ഏഴുപേര്‍ക്കാണ് ശിക്ഷ വിധിച്ചത്.

ഇതില്‍ ആറു പേര്‍ തൗഹീദ് അല്‍ ജിഹാദ് വിഭാഗത്തിന്റെയും രണ്ടു പേര്‍ തെഹ്‌രീകെ താലിബാന്റെയും ജെയ്ഷെ മുഹമ്മദിന്റെയും പ്രവര്‍ത്തകരാണ്. കൂടാതെ, കറാച്ചിയില്‍ സൈനികര്‍ക്ക് നേരെ ആക്രമണം നടത്തിയ കേസിലെ പ്രതിക്കും കോടതി വധശിക്ഷ വിധിച്ചിട്ടുണ്ട്.

2014 ഡിസംബര്‍ 16നായിരുന്നു കേസിന് ആസ്പദമായ സംഭവം. പെഷവാറില്‍ സൈനിക സ്കൂളില്‍ അതിക്രമിച്ചു കയറിയ ഭീകരര്‍ 125 വിദ്യാര്‍ഥികള്‍ അടക്കം 151 പേരെ വെടിവെച്ചു കൊന്നിരുന്നു. വിദ്യാര്‍ഥികള്‍ക്കും അധ്യാപകര്‍ക്കും നേരെ താലിബാന്‍ ഭീകരര്‍ വെടിയുതിര്‍ക്കുകയായിരുന്നു. സൈന്യം നടത്തിയ പ്രത്യാക്രമണത്തില്‍ ആറു ഭീകരരെ വധിച്ചിരുന്നു.