‘പാമ്പുകളുടെ വീട്’ വില്‍പ്പനയ്ക്ക്, താല്പര്യമുള്ളവര്‍ക്ക് വാങ്ങാം! യുഎസിലെ ഇഡാഹോയിലുള്ള ഒരു വീട് പാമ്പുകളെ കൊണ്ട് നിറഞ്ഞിരിക്കുകയാണ്. പാമ്പുകളെ കൊണ്ട് പൊറുതിമുട്ടിയ ഉടമസ്ഥര്‍ ഈ വീട് എങ്ങനെയെങ്കിലും കയ്യൊഴിയാന്‍ പാടുപെടുകയാണ്.
പാമ്പുകളുടെ ‘അധിനിവേശ’ത്തില്‍ മനസ്സുമടുത്ത ഉടമസ്ഥര്‍ കഴിഞ്ഞ വര്‍ഷം തന്നെ ഇഡാഹോയിലെ ‘പാമ്പ് വീട്’ വിട്ടിറങ്ങിയിരുന്നു. വീട് തുറന്ന് അകത്തു കയറിയാല്‍ ഉടന്‍ മേല്‍ക്കൂരയിലും വാതിലിലും എല്ലാം പാമ്പുകള്‍ ഇഴഞ്ഞ് നടക്കുന്നതാണ് കാണാനാവുക. കിടന്നുറങ്ങുമ്പോള്‍ ഏതു നിമിഷവും അവ കിടക്കയിലേക്ക് കടന്നുവന്നു എന്നും വരാം.
ഇപ്പോള്‍, വാര്‍ത്തകളില്‍ സ്ഥാനം‌പിടിച്ചിരിക്കുന്ന ഇഡാഹോയിലെ വീട്ടില്‍ ആയിരക്കണക്കിന് പാമ്പുകളാണ് ഉള്ളത്. യുഎസില്‍ പരക്കെ കാണപ്പെടുന്ന ‘ഗാര്‍ട്ടര്‍’ പാമ്പുകളാണ് ഈ വീട് സ്വന്തം ആവാസകേന്ദ്രമാക്കി മാറ്റിയിരിക്കുന്നത്. ഇവ അപകടകാരികളല്ലെങ്കിലും പാമ്പുകള്‍ നുരയുന്ന സ്ഥലത്ത് എങ്ങനെ താമസിക്കും എന്നാണ് വീടിന്റെ മുന്‍ ഉടമസ്ഥര്‍ ചോദിക്കുന്നത്.
ഏതെങ്കിലും ഒരു പാമ്പ് സ്നേഹിക്കു മാത്രമേ ഈ വീട് വാങ്ങാന്‍ സാധിക്കൂ എന്ന് വില്‍പ്പനയ്ക്ക് വേണ്ടി ശ്രമിക്കുന്ന ഇടനിലക്കാരന്‍ ടോഡ് ഡേവിസ് അഭിപ്രായപ്പെടുന്നു. അഞ്ച് കിടപ്പുമുറികളുള്ള ഈ വീടിന് കുറഞ്ഞത് 175,000 ഡോളറെങ്കിലും വിലയുണ്ട്. എന്നാല്‍, ഇപ്പോളിത് വെറും 109,000 ഡോളറിനാണ് വില്‍പ്പനയ്ക്ക് വച്ചിരിക്കുന്നത്.
