രാജ്യത്ത്‌ സംഭവിക്കുന്ന നാടകീയ മാറ്റങ്ങള്‍ക്ക്‌ ഒടുവില്‍ ഒരു കശാപ്പ്‌ശാലയില്‍ ജോലിക്ക്‌ എത്തുന്ന അവള്‍ സ്നേഹിക്കാന്‍ കഴിയാത്ത ആളെയാണ്‌ കല്യാണം കഴിക്കുന്നത്‌. അവനില്‍ നിന്ന്‌ വിവാഹമോചനം തേടുമ്പോള്‍ തന്‍റെ പ്രണയത്തിന്‍റെ സമ്മാനമായി അവന് സ്വന്തം കോന്ത്രപല്ല് സമ്മാനമായി നല്‍കുന്നു. വേദന സഹിച്ചു കൊണ്ടു തന്നെ സ്വന്തം പല്ല് പറിച്ച് അവന് നല്‍കാന്‍ അവള്‍ ദന്തിസ്റ്റിനെ സമീപിക്കുന്നു, കാരണം ഓരോ പ്രണയത്തിന്‍റേയും ഓര്‍മ്മക്ക് അവള്‍ക്ക് ഓരോ വേദന വേണം.
സ്നേഹം സമ്മാനിച്ച മുറിവുകള്‍ താലോലിച്ച്‌ ഭൂതകാല പ്രണയങ്ങളില്‍ അഭിരമിക്കുകയാണ്‌ അവള്‍. പ്രണയത്തിന്‍റെ കുറുക്ക്‌ വഴി വേദനയാണെന്ന്‌ അവള്‍ തിരിച്ചറിയുന്നു.
ബിജിങ്ങ്‌ ഫിലിം അക്കാദമിയിലെ അധ്യാപകനും ചൈനയിലെ ടെലിവിഷന്‍ തിരക്കഥാകൃത്തുമായ സുയാങ്ങ്‌ യുക്സിന്‍ പത്തുവര്‍ഷത്തെ പരിശ്രമത്തിലൂടെയാണ്‌ സിനിമയുടെ തിരക്കഥ ഒരുക്കിയത്‌ എന്ന്‌ വെളിപ്പെടുത്തിയിട്ടുണ്ട്‌.
നിരവധി രാജ്യാന്തരമേളകളില്‍ ഇതിനോടകം ചിത്രം ശ്രദ്ധിക്കപ്പെട്ടിട്ടുണ്ട്‌.ഡുവില്ലെ ഏഷ്യന്‍ ചലച്ചിത്രമേളയില്‍ ചിത്രം മികച്ച കഥാചിത്രമായി തെരഞ്ഞെടുക്കപ്പെട്ടിരുന്നു.
