ലോകഫുട്ബോളിൽ എല്ലാ നേട്ടങ്ങളും കൈപ്പിടിയിലൊതുക്കിയിട്ടൂം ഇതുവരെയും ലയണൽ മെസ്സിക്ക് എത്തിപ്പിടിക്കാനാവാത്ത ഒരു സ്വപ്നമെയുള്ളു. 2014ൽ കപ്പിനും ചുണ്ടിനുമിടയിൽ നഷ്ടമായ ലോകകപ്പ് കിരീടം. 2014ൽ നിന്നും 2022ലേക്കെത്തുമ്പോൾ ലയണൽ മെസ്സിയും അർജൻ്റീന ടീമും ഒരുപാട് മാറി. ഇതിന് കാരണക്കാരനായതാവട്ടെ ടീമിലെ പകരക്കാരൻ കോച്ചായി എത്തി അർജൻ്റീൻ തന്ത്രങ്ങളുടെ അമരത്ത് നിൽക്കുന്ന ലയണൽ സ്കലോണി എന്ന യുദ്ധതന്ത്രജ്ഞൻ്റെ സാന്നിധ്യവും.

മെസ്സിയെ തളച്ചാൽ അർജൻ്റീനയെ വീഴ്ത്താം എന്നതിൽ നിന്നും മാറി മെസ്സിയെ മാത്രം ആശ്രയിച്ച് കളിക്കുന്ന അർജൻ്റീനയിൽ നിന്ന് ഒരു ടീമായി കളിക്കുന്ന ഒരുപറ്റം കളിക്കാരുടെ സംഘമാക്കി മാറ്റാൻ കഴിഞ്ഞു എന്നതാണ് സ്കലോണിയുടെ വിജയം. മെസ്സിയെ മാത്രം ആശ്രയിക്കുന്ന കളിരീതി മാറിയപ്പോൾ തന്നെ തനിക്ക് മേലുള്ള സമ്മർദ്ദത്തിൽ അയവ് വരികയും കൂടുതൽ അപകടകാരിയായ മെസ്സിയെ കളിക്കളത്തിൽ കാണാനാവുകയും ചെയ്തു.

ഖത്തർ ലോകകപ്പിനെത്തുമ്പോൾ സ്കലോണിയൻ ടീമിലെ പ്രധാനിയായിരുന്ന മെസ്സിയ്ക്ക് നിരന്തരം പന്തെത്തിച്ചുകൊണ്ടിരുന്ന ജിയോവാനി ലെസെൻസോയുടെ സേവനം നഷ്ടമായത് അർജൻ്റീനയ്ക്ക് കടുത്ത നഷ്ടമാണ് വരുത്തിയത്. എങ്കിലും ജൂലിയൻ ആൽവാരെസ്,ലിസാൻഡ്രോ പരെഡസ്,മക് അലിസ്റ്റർ,എൻസോ ഫെർണാണ്ടസ് എന്നീ താരങ്ങളെ സ്കലോണി സമർഥമായി ഉപയോഗപ്പെടുത്തി.

റോഡ്രിഗോ ഡിപോളിൽന് നിർണായക സ്ഥാനവും ആക്രമണങ്ങൾക്ക് ചുക്കാൻ പിടിക്കാൻ മെസ്സിയും ജൂലിയൻ ആൽവാരെസുമുള്ള അർജൻ്റീനിയൻ നിര ആത്മവിശ്വാസമുള്ള ഒരു സംഘം പോരാളികളുടെ ടീമാണ്. പ്രതിരോധത്തിൽ മികച്ച പ്രകടനമാണ് ഓട്ടമെൻഡി നടത്തുന്നത്. യുവതാരം ക്രിസ്റ്റ്യൻ റൊമോറൊയുടെ സാന്നിധ്യവും ടീമിന് കരുത്ത് നൽകുന്നു. ഗോൾ കീപ്പർ എമിലിയാനോ മാർട്ടിനെസിൻ്റെ പ്രകടനവും എടുത്തുപറയേണ്ടതാണ്.

2019ലെ കോപ്പ അമേരിക്ക സെമിയിൽ ബ്രസീലിനോട് തോൽവി വഴങ്ങിയതിന് ശേഷം തുടർച്ചയായി 36 മത്സരങ്ങൾ അപരാജിതിരായി തേരോട്ടം നടത്തിയാണ് ലോകകപ്പിനെത്തിയതെങ്കിലും ടൂർണമെൻ്റിലെ ആദ്യ മത്സരത്തിൽ തന്നെ സൗദിയോട് തോറ്റ് അർജൻ്റീന മാനസികമായി തകർന്നിരുന്നു. എന്നാൽ തുടർന്നുള്ള കളികളിൽ കളിക്കാർക്ക് ആത്മവിശ്വാസം നൽകി അവരെ ഫൈനൽ വരെ എത്തിക്കുന്നതിൽ സ്കലോണിയുടെ പങ്ക് വിവരിക്കാനാവാത്തതാണ്. വീണ്ടുമൊരു ഫൈനൽ മത്സരത്തിന് ലോകം കാത്തിരിക്കുമ്പോൾ അർജൻ്റൈൻ പ്രതീക്ഷകൾ സ്കലോണിയിൽ കൂടി അർപ്പിതമാണ്.