സംവിധാനം - ഗീതു മോഹന്‍‌ദാസ്, നായിക - മഞ്ജുവാര്യര്‍?
WEBDUNIA|
PRO
മഞ്ജുവാര്യര്‍ സിനിമയിലേക്ക് തിരിച്ചുവരുന്നതായി റിപ്പോര്‍ട്ട്. ഗീതു മോഹന്‍‌ദാസ് സംവിധാനം ചെയ്യുന്ന ചിത്രത്തിലൂടെ മഞ്ജു സിനിമാലോകത്തേക്ക് തിരികെയെത്തുന്നു എന്നാണ് വാര്‍ത്തകള്‍ ലഭിക്കുന്നത്. ഗീതു ചിത്രത്തിന്‍റെ തിരക്കഥ പൂര്‍ത്തിയാക്കിയെന്നും കഥയും കഥാപാത്രവും മഞ്ജുവിന് ഇഷ്ടമായെന്നുമാണ് വിവരം.
ഈ പ്രൊജക്ടുമായി ബന്ധപ്പെട്ട് മഞ്ജുവാര്യരും ഗീതു മോഹന്‍‌ദാസും പല തവണ കൂടിക്കാഴ്ച നടത്തിയത്രേ. നായികാപ്രാധാന്യമുള്ള ഈ സിനിമ വന്‍ ബജറ്റിലായിരിക്കും ഒരുക്കുകയെന്നും ഗീതുവിന്‍റെ ഭര്‍ത്താവ് രാജീവ് രവിയായിരിക്കും ഛായാഗ്രഹണമെന്നുമാണ് റിപ്പോര്‍ട്ടില്‍ പറയുന്നത്.
മഞ്ജുവിന്‍റെ മടങ്ങിവരവ് ചിത്രം സംബന്ധിച്ച് ഒട്ടേറെ റൂമറുകള്‍ ദിനം‌പ്രതി പ്രചരിക്കുന്നതിനിടെയാണ് ഗീതു മോഹന്‍‌ദാസിന്‍റെ പ്രൊജക്ടിനെക്കുറിച്ചുള്ള വിവരവും എത്തിയിരിക്കുന്നത്. മഞ്ജുവിന്‍റെ അടുത്ത സുഹൃത്തുകൂടിയാണ് ഗീതു മോഹന്‍‌ദാസ്.
വാല്‍ക്കഷണം: ‘കേള്‍ക്കുന്നുണ്ടോ?’ എന്ന ചിത്രത്തിലൂടെയാണ് ഗീതു മോഹന്‍‌ദാസ് സംവിധാന രംഗത്തേക്ക് കടക്കുന്നത്. മഞ്ജുവാര്യര്‍ നായികയാകുന്ന ചിത്രത്തിലൂടെ കൊമേഴ്സ്യല്‍ സിനിമകളുടെ ലോകത്തേക്കും ഗീതു വരികയാണെന്ന് റിപ്പോര്‍ട്ടുകള്‍ സൂചിപ്പിക്കുന്നു.
