വിദ്യയോ നയന്‍‌സോ അല്ല, മം‌മ്തയാണ് മമ്മൂട്ടിയുടെ നായിക
WEBDUNIA|
PRO
കഴിഞ്ഞ 30 വര്‍ഷമായി മമ്മൂട്ടിയുടെ നായികയായി അഭിനയിക്കാന്‍ മുന്‍‌നിര നായികമാര്‍ തമ്മില്‍ മത്സരമാണ്. എന്നാല്‍ ‘മതിലുകള്‍ക്കപ്പുറം’ എന്ന സിനിമ നിര്‍മ്മിക്കാന്‍ മമ്മൂട്ടി തീരുമാനിച്ചപ്പോള്‍ നായികാനിര്‍ണയം ഇത്രയും വലിയ കുരുക്കായിരിക്കുമെന്ന് പ്രതീക്ഷിച്ചുകാണില്ല. അടൂര് ഗോപാലകൃഷ്ണന്‍ സംവിധാനം ചെയ്ത ‘മതിലുകള്’ എന്ന സിനിമയുടെ രണ്ടാം ഭാഗമാണ് മതിലുകള്‍ക്കപ്പുറം. നവാഗതനായ പ്രസാദാണ് സംവിധായകന്‍.
വിദ്യാ ബാലനെയായിരുന്നു ഈ ചിത്രത്തില്‍ നായികയാക്കാന്‍ ആദ്യം തീരുമാനിച്ചിരുന്നത്. എന്നാല്‍ ഹിന്ദിയിലെ തിരക്കിന്‍റെ ന്യായം പറഞ്ഞ് വിദ്യ ഒഴിഞ്ഞു. പിന്നീട് നയന്‍‌താരയെ സമീപിച്ചു. നയന്‍സ് അഭിനയിക്കാമെന്ന് വാക്കും കൊടുത്തു. എന്നാല്‍ പിന്നീട് പിന്‍‌മാറി. ഡേറ്റില്ലാത്തതുകൊണ്ടാണ് പിന്‍‌മാറ്റമെന്നായിരുന്നു നയന്‍സിന്‍റെ ന്യായീകരണം.
എന്തായാലും സിനിമയിലെ നായികയെ ഒടുവില്‍ കണ്ടെത്തിയിരിക്കുകയാണ്. മം‌മ്തയാണ് മതിലുകള്‍ക്കപ്പുറത്തില്‍ മമ്മൂട്ടിയുടെ നായികയാകുന്നത്. മതിലുകളില്‍ കെ പി എ സി ലളിത ശബ്ദത്തിലൂടെ അവിസ്മരണീയമാക്കിയ നാരായണി എന്ന കഥാപാത്രത്തെയാണ് ഈ സിനിമയില്‍ മംമ്ത അവതരിപ്പിക്കുന്നത്. മാര്‍ച്ച് അഞ്ചിന് തഞ്ചാവൂരില്‍ സിനിമയുടെ ചിത്രീകരണം ആരംഭിക്കും.
ബസ് കണ്ടക്ടര്‍, ബിഗ്ബി എന്നീ മമ്മൂട്ടിച്ചിത്രങ്ങളില്‍ മംമ്ത അഭിനയിച്ചിട്ടുണ്ട്. എന്നാല്‍ ആ സിനിമകളിലൊന്നും മമ്മൂട്ടിയുടെ നായികയായല്ല മംമ്ത വേഷമിട്ടത്. മമ്മൂട്ടിയുടെ പ്രണയിനിയായി അഭിനയിക്കാനുള്ള ഭാഗ്യം വൈകിയാണെങ്കിലും തന്നെത്തേടിയെത്തിയതിന്‍റെ ആവേശത്തിലാണിപ്പോള്‍ മംമ്ത.
പ്ലേ ഹൌസിന്‍റെ ബാനറില്‍ മമ്മൂട്ടി നിര്‍മ്മിക്കുന്ന മതിലുകള്‍ക്കപ്പുറത്തിന്‍റെ ശബ്ദ സംവിധാനം നിര്‍വഹിക്കുന്നത് റസൂല്‍ പൂക്കുട്ടിയാണ്.
