BIJU|
Last Modified ബുധന്‍, 29 മാര്‍ച്ച് 2017 (14:05 IST)
സ്റ്റൈല്‍ കാണിക്കാന്‍ ഇറങ്ങിയാല്‍ മമ്മൂക്കയെ വെല്ലാന്‍ ആരുമില്ല എന്ന പ്രയോഗം മമ്മൂട്ടി ആരാധകര്‍ പതിവായി നടത്തുന്നതാണ്. അതില്‍ അതിശയോക്തി ഒന്നുമില്ല. കാരണം മലയാളത്തിലെ ഏറ്റവും സ്റ്റൈലിഷായ ചില കഥാപാത്രങ്ങള്‍ മമ്മൂട്ടിയുടെ വകയാണ്.
സാമ്രാജ്യവും ഡാഡി കൂളും ഗാംഗ്സ്റ്ററും ദി കിംഗും വൈറ്റും ബിഗ്ബിയുമെല്ലാം അതിന്‍റെ ഉത്തമോദാഹരണങ്ങള്‍. ആ ഗണത്തിലേക്കാണ് ഏറ്റവും പുതിയ സിനിമ ദി ഗ്രേറ്റ്ഫാദറും എത്തുന്നത്.
ഗ്രേറ്റ്ഫാദറിന്‍റെ പുതിയ ടീസര്‍ തന്നെ നോക്കൂ. ഒരു കാറില്‍ വന്നിറങ്ങുകയും പിന്നീട് കാറില്‍ പാഞ്ഞുപോകുകയും ചെയ്യുന്ന മമ്മൂട്ടിയെയാണ് ടീസറില്‍ കാണുന്നത്. കൂളിംഗ് ഗ്ലാസും അടിപൊളി ഷര്‍ട്ടും ടൈറ്റ് ജീന്‍സും റഫ് ഷൂസുമൊക്കെയായി തിളങ്ങുകയാണ് മമ്മൂട്ടി. ഡേവിഡ് നൈനാന്‍ എന്ന കഥാപാത്രമായി മമ്മൂട്ടി തകര്‍ക്കുമെന്ന് ഉറപ്പുനല്‍കുന്ന ടീസര്‍.
മമ്മൂട്ടിയുടെ നടപ്പിലും നോട്ടത്തിലും ഉപയോഗിക്കുന്ന വാഹനത്തിലുമെല്ലാം പുതിയ സ്റ്റൈല്‍ കൊണ്ടുവരാന്‍ സംവിധായകന്‍ ഹനീഫ് അദേനിക്ക് കഴിഞ്ഞിരിക്കുന്നു. അതുകൊണ്ടുതന്നെയാണ് അടുത്ത 100 കോടി ക്ലബ് പ്രതീക്ഷയായി ദി ഗ്രേറ്റ്ഫാദര്‍ മാറുന്നതും.
മോഹന്‍ലാലിന്‍റെ ഏറ്റവും സ്റ്റൈലിഷ് ലുക്ക് അടുത്തിടെ ലൂസിഫറിന്‍റേതായി പുറത്തുവന്നതാണ്. എന്നാല്‍ അതിനെയും മറികടക്കുകയാണ് ഡേവിഡ് നൈനാനിലൂടെ മമ്മൂട്ടി.
